Быйыл өрөспүүбүлүкэ үрдүнэн 16500 кырачаан оскуола боруогун атыллаата. Үгэс курдук, үөрэх дьылын көрсө уон саҥа оскуола аһылынна. Ил Дархан Егор Борисов Саха Өрөспүүбүлүкэтин салалтатын уонна бэйэтин аатыттан Билии күнүнэн, үөрэх дьыла саҕаламмытынан бар дьонугар эҕэрдэтин тириэрдэр.
“Олохпут биир кэрдиис кэмэ оскуолатааҕы сылларбытын кытары ыкса сибээстээх. Киһи олоҕун устатын тухары үөрэнэр, сылтан сыл саҥаны, сонуну билэр, дьоҕурун, кыаҕын сайыннаран иһэр. Онуоха оскуолаҕа ылбыт билиибит төһүү күүс буолар. Оскуола боруогуттан кынат анньынан олох киэҥ аартыгар үктэнэбит. Онон Билии күнэ хас биирдиибитигэр күндү бырааһынньык. Бу күн биһиги оскуолатааҕы сылларбытын, үөрэппит учууталларбытын ахтан-санаан кэлэбит, кинилэргэ махтал тылларын этэбит”, — диэн бэлиэтиир Ил Дархан.
Даҕатан эттэххэ, быйылгы үөрэх дьылыгар өрөспүүбүлүкэ үрдүнэн 10 саҥа оскуола киирдэ, 1553 үөрэх миэстэтэ арылынна, 34 оҕо саада аанын арыйда. Манна 2188 миэстэ тэрилиннэ.
“Билигин оҕо үөрэнэригэр, сайдарыгар суол барыта аһаҕас. Хас биирдии оҕо спортка, искусствоҕа, наукаҕа бэйэтин көрдөрүөн, талаанын арыйыан сөп. Үөрэх саҥа ньымата, хайысхата, ону сэргэ саҥа таһым аан дойду ааттаахтарын кытары тэҥҥэ хаамсар киэҥ билиилээх, үөрэхтээх кэнэҕиски ыччаты иитэн-үөрэтэн таһаарыыга улахан оруолу оонньууллар. Биир оннук хайысханан олимпиадалары ыытыы буолар. Быйыл физикаҕа бүтүн Азиятааҕы олимпиада буолан ааста. Эһиил “Азия кэнчээри ыччата” интеллектуальнай оонньуу ыытыллыаҕа”, — диэн этэр Егор Афанасьевич.
Санатан эттэххэ, Ил Дархан талааннаах оҕолорго туһаайбыт анал ыйааҕынан оҕо талаанын, дьоҕурун арыйыыга биир тиһиктээх үгүс үлэ ыытыллар, үлэҕэ, кэрэҕэ тардыһыытын, төрөөбүт дойдуга тапталы иҥэриигэ оҕо уопсастыбаннай хамсааһынын тэрийэн ыыталлар.
Билии күнэ бастакы уонна уон биирис кылаастарга ордук долгутуулаах. Ил Дархан кинилэргэ туһаайан: “Бастакы кылаас үөрэнээччилэригэр бу күн олус күүтүүлээх. Олоххут биир саҥа кэрдиис кэмигэр үктэннигит, үөрэх-билии киэҥ айаныгар туруннугут. Кэрэни кэрэхсии, киэҥ билиилээх буола улаатыҥ. Оттон оскуола выпускниктарыгар олохторугар биир эппиэтинэстээх кэмнэрэ үүннэ. Биир өттүнэн, түмүгү таһаарар кэмҥит, иккис өттүнэн, бэйэҕитин көрдөрөр, саҥа доҕоттордонор, сонуну арыйар кэмҥит. Онуоха айаҥҥыт ситиһиилээх, суолгут өрүү сырдык буоллун”, — диэн иһитиннэрдэ.
Уонна түмүккэ учууталларга айар үлэлэригэр ситиһиини, түмүктээх үлэни баҕарда.
Аграфена КУЗЬМИНА, “Саха сирэ” хаһыат, edersaas.ru