Күндү Саха сирин олохтоохторо!
Бүгүн биһиги өрөспүүбүлүкэбит бэлиэ даатаны — олохтоох салайыныы уоргана тэриллибитэ 15 сылын бэлиэтиир. Олохтоох салайыныыга тэрээһиннээхтик киирии 2002 сыл ахсынньы 29 күнүгэр, Дьокуускай куоракка уонна улуустарга аан бастаан муниципальнай тэриллиилэр дьаһалталарын баһылыктара итиэннэ бэрэстэбиитэллээх уорганнар дьокутааттара талыллыахтарыттын саҕаламмыта.
Саха өрөспүүбүлүкэтигэр бу ааспыт 15 сыл олохтоох салайыныы нэһилиэнньэ олоҕун-дьаһаҕын хааччыйыы сүрүн боппуруостарын быһаарар олохтоох былаас институтунан буолла. Кини судаарыстыбаннай былаас уорганнарын кытары ыкса ситимнээхтик үлэлиир. Өрөспүүбүлүкэ бырабыыталыстыбата судаарыстыбаннай бырагыраамалар чэрчилэринэн, үп-харчы өттүнэн өйөбүлү, бүддьүөттэр икки ардыларынааҕы дьайыылары оҥорор. Маннык үлэ түмүгэр, судаарыстыбаннай былаас уорганнарын билиилэригэр баар боппуруостар көмөлөөн быһаарыллаллар, олохтоох салайыныы уорганнарын боломуочуйаларын туһунан сокуон эйгэтэ кэҥэтиллэр итиэннэ саамай сүрүнэ – олохтоох салайыныы уорганнарыгар эрэл-итэҕэл улаатан иһэр.
Быйылгы 2018 сыл Саха сиригэр Дьарыктаах буолуу сылынан биллэриллибитэ. Маныаха үлэ хас да хайысханан ыытыллар, олортон саамай сүрүннэрэ – эбии үлэ миэстэтин таһаарыы, предпринимательствоны өйөөһүн буолар. Итинэн сибээстээн, муниципальнай былаас уорганнарын иннилэригэр олохтоох суолталаах боппуруостары нэһилиэнньэ бэйэтэ быһаарарын хааччыйар сорук турар.
Биһиги сүрүн сыалбыт – олорор эйгэни тупсарар, олох таһымын үрдэтэр туһугар Саха Өрөспүүбүлүкэтин социальнай-экономическэй уонна уопсастыбаннай-политическай сайдыытыгар өрөспүүбүлүкэ хас биирдии олохтооҕун тардыы.
Саха Өрөспүүбүлүкэтин Ил Дархана Егор Борисов