Субуотаҕа, “Триумф” Спорка бэлэмнэнии киинигэр СӨ Спорка министиэристибэтин уонна өрөспүүбүлүкэтээҕи панкратион федерациятын тэрийиилэринэн Ил Дархан кубогар булкаастаах киирсиилэргэ норуоттар икки ардыларынааҕы күрэхтэһии ыытыллар.
Петр ПАВЛОВ, “Саха сирэ”, www.edersaas.ru
Манна биһиги аныгы панкратион күүстээх байыастарын уонна Индия, Соҕуруу Корея спортсменнарын киирсиилэрин көрүөхпүт. Бу күн чэпчэки уонна орто ыйааһыннарга барыта биэс киирсии ыытыллыа. Ону тэҥэ ыарахан ыйааһыҥҥа икки сүүмэрдиир киирсии ыытыллара былааннанар. Санатан эттэххэ, бу турнир Уһук Илиннээҕи аныгы панкратион федерациятын 207-c турнирынан буолуоҕа.
Ол курдук, Ил Дархан кубогар көрсүөхтэрэ: Григорий Попов (“Урааҥхай”) — Ким Сунг Чже (Соҕуруу Корея), Алексей Пасторов (“Хаандыга”) — Андрей Харченко (Благовещенскай), Мичил Осипов (“Урааҥхай”) — Дипеш Расал (Индия), Казимир Захаров (“Sakha Wrestling MMA”) — Санни Хатри (Индия), Дьулустан Акимов (“Sakhafighth”) — Евгений Рязанов (Хабаровскай).
Оттон ROAD FC турнир сүүмэрдиир киирсиитигэр Герман Березкин (Дьокуускай) – Евгений Лахин (Омскай) уонна Эльнур Агаев (Хабаровскай) – Павел Гардеев (Омскай) көрсүөхтэрэ.
Дьулустан Акимов утарсааччыта, Россия кикбоксиҥҥа чөмпүйүөнэ Евгений Рязанов: “Мин киирсэр киһим – дэгиттэр кыахтаах спортсмен. Онон киирсии бары ньыматыгар бэлэмнэниэхпин наада. Сүрүн тактикам – туох да саарбаҕа суох эрэллээхтик кыайыы. Миэхэ ыарахан буолуохтааҕын билэбин, чэпчэки суолу көрдөөбүтүм буоллар, ити күрэхтэһиигэ кыттыам суоҕа этэ, — диэн “Хабаровскай сонуннара” сайт (Dvhab.ru.) кэрэспэдьиэнигэр этэр.
Онон биһиги субуотаҕа “Триумфка” сытыы киирсиилэри көрүөхпүт. Ил Дархан кубогын ким ылар эбитий?
Петр ПАВЛОВ, “Саха сирэ”, www.edersaas.ru
Хаартыскаҕа: «Урааҥхай» спортивнай-патриотическай кулууп байыаһа Григорий Попов.