Бэлиэтээн эттэххэ, вице-премьердэр, федеральнай миниистирдэр, корпорациялар баһылыктара эрэ киирбит дьоһун дэлэгээссийэҕэ икки эрэ регион баһылыгын ыллылар: биһиги Егор Борисовпытын кытта Карелия баһылыгын Александр Парфенчиковы.
Дэлэгээссийэ Кытай Народнай Өрөспүүбүлүкэтин бэрэссэдээтэлин Си Цзиньпины кытары көрсөн мунньахтыаҕа. Ону таһынан, Дмитрий Медведев КНР Судаарыстыбаннай сэбиэтин премьера Ли Кэцяны кытары мунньахтыаҕа. Бу – икки судаарыстыба бырабыыталыстыбаларын, үгэскэ кубулуйбут, 22-с көрсүһүүлэрэ.
Россия өттүттэн вице-премьердэри, миниистирдэри таһынан федеральнай структура салайааччылара кыттыыны ылыахтара. Регионнар салайааччыларыттан Саха сирин, Карелия лидердэрэ Егор Борисов уонна Александр Парфенчиков кыттыахтара.
Кытай премьер-миниистирэ Си Цзиньпины кытары көрсүһүүгэ Дмитрий Анатольевич атыы-эргиэн, экономика, инвестиция боппуруостарын таарыйар санаалаах. Ол курдук, көрсүһүүгэ “Новатэк” хампаанньа Кытай судаарыстыбаннай баанын, ньиэп эйгэтигэр үлэлиир национальнай корпорациятын кытары үлэлэһиитигэр докумуон баттаһыыта буолуоҕа. Санатан эттэххэ, “Новатэк” хампаанньа “Арктик СПГ-2”, “Ямал СПГ” диэн ыгыллыбыт гааһы оҥорон таһаарыыга улахан бырайыактардаах.
Россия дэлэгээссийэтэ, маны сэргэ, тыа хаһаайыстыбатын эйгэтигэр үлэлэһэр. Россияттан Кытайга сэлиэһинэй бурдук, подсолнечник, гречка, эбиэс, лүөн экспорка тахсыаҕа. Манна, сүрүннээн, Омскай, Новосибирскай, Красноярскай, Алтай, Челябинскай, Амур регионнара үлэлэһэллэр.
Табаары таһаарыыга таможеннай сулууспалар бииргэ үлэлэһэллэрэ ирдэниллэр. Онон манна эмиэ болҕомто ууруллуоҕа. Көрсүһүү түмүгүнэн Роскосмос Кытайы кытары 2022 с. диэри үлэлэһэр бырагыраамаҕа илии баттаһыаҕа. “Внешэкономбаан” Кытай экспортнай-импортнай баанын кытары дуогабар түһэрсиэҕэ. Маны таһынан, Россия уонна Кытай бииргэ үлэлээһиннэригэр докумуоннары баттаһыы буолуоҕа.
Аграфена КУЗЬМИНА, “Саха сирэ” хаһыат, edersaas.ru.