Балаҕан ыйын 6 күнүгэр Ил Түмэҥҥэ Эдьигээн бөһүөлэгэ төрүттэммитэ 385 сылыгар аналлаах көрсүһүү буолла. Тэрээһини Ил Түмэн бэрэссэдээтэлэ Александр Жирков арыйда. Кини Дьокуускай куоракка ыытыллыбыт Эдьигээн күннэрин тэрийсибит дьоҥҥо махтанна. Эбэҥки чулуу уола Николай Шемяков олоҕун туһунан «Тайахтаах сулуһум анныгар» испэктээги биһирээбитин биллэрдэ. Режиссер Туяра Егорова, Саха тыйаатырын артыыстара Владимир Иванов, Михаил Ефимов, Варвара Васильева, Айаал Софронов, Саргылаана Ксенофонтова, Николай Саввинов, уонна да атын кыттыыны ылбыт дьон үлэтин хайҕаата.
Маны таһынан, Александр Жирков Эдьигээн баай устуоруйатын, Саха Өрөспүүбүлүкэтин бастакы бэрэсидьиэнэ Михаил Николаев Эдьигээн улууһугар таһаарыылаах үлэтин, сахаттан бастакы көҥүл тустууга олимпиада чөмпүйүөнэ Роман Дмитриевы, саха литературатын биир төрүттээччитэ Афанасий Уваровскайы уо.д.а Эдьигээн чулуу дьонун ахтан аһарда.
Улуус баһылыга Алексей Мандаров Дьокуускайга ыытыллыбыт Эдьигээн бөһүөлэгин 385 сыллаах үбүлүөйдээх тэрээһиннэрин туһунан сырдатта. Маны таһынан, дьокутааттарга туһаайан Эдьигээҥҥэ этно-култуурунай киин, киинэ тыйаатыра, Баханы, Кыстатыам, Эдьигээн бөһүөлэктэригэр оскуола, Эдьигээн уонна Бэстээх бөһүөлэгэр «Частный Сектор» хочуолунай тутуутугар болҕомтолорун ууралларыгар ыҥырда.
Эҕэрдэ тылларын Ил Түмэн бэрэссэдээтэлин бастакы солбуйааччы Анатолий Добрянцев, Ил Түмэн бэрэссэдээтэлин солбуйааччы Виктор Губарев эттилэр. Эдьигээн улууһун таһаарыылаах үлэтин, Саха Өрөспүүбүлүкэтин сайдыытыгар улахан өҥөтүн бэлиэтээтилэр.
Эдьигээннээҕи дьокутааттар түмсүүлэрин бэрэссэдээтэлэ Вадим Тарасенко, Эдьигээн бөһүөлэгин баһылыга Василий Сорокин Эдьигээн улууһун туһугар үлэлии сылдьар дьоҥҥо махтал суруктарын туттардылар.
Александр Жирков, Ил Түмэн бэрэссэдээтэлэ:
— Бүгүн олус туһалаах, кэрэхсэбиллээх көрсүһүү буолла. Бэлиэтиэм этэ, Эдьигээн оройунун кыһалҕалаах боппуруостарыгар улахан болҕомто ууруллар. Оройуоҥҥа тирээн турар кыһалҕалары быһаарарга дьокутааттары анаатым.
Николай Попов, «Саха сирэ» хаһыат, edersaas.ru
