Ил Түмэҥҥэ былаас баартыйатын фракциятын салайааччынан Владимир Чичигинаров буолла
Бэҕэһээ «Биир ньыгыл Арассыыйа» политическай баартыйа Саха сиринээҕи салаатыттан алтыс ыҥырыылаах Ил Түмэҥҥэ өрөспүүбүлүкэтээҕи испииһэгинэн талыллыбыт норуот дьокутааттарын тэрээһин мунньахтара буолла. «Биир ньыгыл Арассыыйа» политическай баартыйа Ил Түмэҥҥэ фракциятын салайааччытыгар икки кандидатура: Доруобуйа харыстабылыгар хонтуруол федеральнай сулууспатын Саха Өрөспүүбүлүкэтигэр территориальнай уорганын салайааччы Владимир Чичигинаров уонна Саха Өрөспүүбүлүкэтин эргиэн-промышленнай балаататын президенэ Владимир Членов туруоруллубута.
Кистэлэҥ куоластааһын түмүгүнэн, Владимир Чичигинаров баһыйар куолаһы ылан, «Биир ньыгыл Арассыыйа» Ил Түмэҥҥэ фракциятын салайааччынан талылынна. Маны таһынан, биир мандааттаах уокуруктарынан итиэннэ өрөспүүбүлүкэтээҕи испииһэгинэн талыллыбыт норуот дьокутааттара, барыта 46 киһи, фракция састаабыгар ылылыннылар.
Раиса Сибирякова, «Саха сирэ» edersaas.ru.