Ил Түмэн сис кэмитиэтэ Тыа хаһаайыстыбатын миниистирин дуоһунаһыгар саҥа кандидатураны өйөөтө
Ил Түмэн Тыа хаһаайыстыбатыгар уонна аграрнай политикаҕа сис кэмитиэтин бэрэссэдээтэлэ Дмитрий Саввин сис кэмитиэт мунньаҕын ыытта. Тэрээһиҥҥэ Ил Түмэн бэрэссэдээтэлин бастакы солбуйааччыта Анатолий Добрянцев, премьер-миниистир Евгений Чекин, норуот дьокутааттара Александр Уаров, Алексей Еремеев, Василий Местников, Елена Голомарева, Семен Иванов, Семен Березин, Иван Андреев, Василий Тимофеев, Владимир Атаманченко, СӨ бырабыыталыстыбатын бэрэссэдээтэлин I солбуйааччы э.т. Петр Алексеев, үп миниистирэ Валерий Жондоров, министиэристибэлэр уонна биэдэмистибэлэр салайааччылара, эппиэттээх үлэһиттэрэ кытыннылар.
Ил Түмэн дьокутааттара уопсайа 4 боппуруоһу көрдүлэр. Бастатан туран, тыа хаһаайыстыбатын уонна ас-үөл политикатын миниистирин дуоһунаһыгар Александр Атласов кандидатуратын бигэргэтэргэ сөбүлэҥнэрин биэрдилэр.
«Александр Атласов тыа хаһаайыстыбатын салаатыгар 26 сылын үлэлии-хамсыы сылдьар. Агроном үөрэхтээх. Тыа хаһаайыстыбатыгар үлэтин сопхуос оробуочайынан, онтон оҥорон таһаарыы хаһаайыстыбатыгар исписэлииһинэн үлэлиир. Салайар үлэҕэ ураты дьоҕурдаах буолан, улуус баһылыгар тиийэ үүммүтэ. Онон бу тыа хаһаайыстыбатын эйгэтигэр тиһигин быспакка үлэлээн, улууһугар Намҥа үрдүк көрдөрүүнү ситиһэн Ил Дархан эрэлин ылла”, — диэн Саха Өрөспүүбүлүкэтин премьер-миниистирэ Евгений Чекин дакылаатыгар эттэ.
Александр Атласов миниистир буолар түгэнигэр үлэтин сүрүн тосхолун билиһиннэрдэ. Ол курдук, оҥорон таһаарыы бородууксуйатын элбэтэр уонна олохтоох нэһилиэнньэни бэйэ бородууксуйатынан хааччыйыыга болҕомтону уурар сыаллаах. Манна бастакы уочарат ас-үөл кэмбинээттэрин үлэтин саҥардыы улахан оруоллаах диэн бэлиэтээтэ.
Ирина Ханды