Бүгүн Владивостокка үһүс төгүлүн буола турар Илиҥҥи экономическэй форумҥа Россия уонна Кытай бииргэ үлэлээһиннэрин былаһааккатыгар Өлүөнэ өрүһү туоруур муостабыт бырайыага дьүүлгэ таҕыста. Ил Дархан Егор Борисов РФ президенин боломуочуйалаах бэрэстэбиитэлэ Юрий Трутневка бырайыак үбүлүээһинин быһаарар кэм уолдьаспытын эттэ.
Инвестиционнай бырайыагы муоста тутуутунан дьарыктанар “PowerChina International Group Ltd” диэн Кытай хампаанньатын президенэ Сун Дуншен билиһиннэрдэ. Кини бэлиэтииринэн, бу бырайыак аҥаардас Саха сирин олохтоохторугар эрэ буолбакка, Уһун Илин регионнарга барыларыгар ураты суолталаах. Кини бу муоста икки дойдуну сибээстииринэн, доҕордоһуу бэлиэтэ уонна саҥа “улуу солко суолун” салгыыта буолуоҕун иһитиннэрдэ.
Даҕатан эттэххэ, биһиги бырайыакпытыгар ылсыахтарын иннинэ кинилэр ирбэт тоҥноох Тибеккэ муоста тутан тураллар. Онон бу чааһыгар “PowerChina International Group Ltd” бэйэтин көрдөрбүт хампаанньа буолар. Муоста, былаан быһыытынан, 21 км усталаах буолуохтаах. Инвестиционнай бырайыак аҕыйах сыллааҕыта РФ бырабыыталыстыбатын өйөбүлүн ылан, Кытай уонна Россия бииргэ үлэлиэхтээх былааннарыгар киирбитэ. Ол эрээри үбүлээһинэ кыайтарбакка, күн бүгүҥҥэ диэри быһаарыллыбакка турар.
Манна сыһыаран мунньахха Ил Дархан Егор Борисов Уһун Илин федеральнай уокурук аҥаарын Саха сирэ ыларын бэлиэтээн туран, суол-иис, тырааныспар инфраструктуратын сайыннарыы өрөспүүбүлүкэҕэ инники күөҥҥэ сылдьар боппуруос буоларын, бу муоста үс федеральнай суолу (Лена, Халыма, Бүлүү суолларын), өрүс пордун, аэропорду барытын сибээстиирин эттэ. “Инникитин бу муоста Азия, Тиихэй акыйаан дойдуларын сибээстиир, Хотугу муора суолугар тахсар биир улахан бырайыакпытынан буолуох этэ”, — диэн иһитиннэрэр кини. Уонна РФ бырабыыталыстыбатын вице-премьерэ Юрий Трутневка туһаайан, Россия уонна Кытай бииргэ үлэлээһиннэрин көрөр хамыыһыйаҕа бырайыак үбүлээһинин быһаарарга төһүү күүс буоларыгар эттэ.
Санатан эттэххэ, РФ президенэ Владимир Путин Илиҥҥи экономическай форумҥа улахан болҕомто тырааныспар боппуруоһугар ууруллуоҕун туһунан эрдэ иһитиннэрэн турар. Онно кини Уһук Илин регионнарга инфраструктураны сайыннарар үгүс бырайыак баарын, бу бырайыактар бары регион социальнай эйгэтин, дьон олоҕун тупсарыыга туһуламмыттарын бэлиэтээн эппитэ.
Аграфена КУЗЬМИНА, «Саха сирэ» хаһыат, edersaas.ru,
Мария ВАСИЛЬЕВА хаартыскаҕа түһэриитэ.