Дмитрий Медведев РФ бырабыыталыстыбатын 339 №-дээх уурааҕынан, инбэлииккэ тахсыыга сыһыаннаах быраабылалары уларытта.
edersaas.ru
«Бастатан туран, организмҥа тахсар уларыйыылар уонна ыарыылар ахсааннара элбэтилиннэ. Иккиһинэн, ыарахан туруктаах дьону көрөр наада буоллаҕына, кинилэр ыраах сиргэ олороллоро учуоттаныаҕа. Ити туоһулааһыны кэтэхтэн ыытарга кыаҕы биэрэр. Өссө да атын уларыйыылар бааллар», – диэн Дмитрий Медведев иһитиннэрдэ.
Маныаха нуорма-быраап аактатын Арассыыйа Үлэҕэ министиэристибэтэ В.Путин сорудаҕын толоруунан сибээстээн оҥордо.
Санатан эттэххэ, ыарыһаҕы инбэлиитинэн билинии быраабылалара 2006 с. олунньуга бигэргэммиттэрэ.
Саҥа быраабылалар инбэлииттэри реабилитациялааһын уонна абилитациялааһын тустаах бырагырааматыгар уларытыылары киллэриигэ эмиэ сыһыаннаахтар.
Ону сэргэ ыарыылар, араас дьиэктэр, морфологическай уларыйыылар, организм функцияларын уларыйыыларын ахсаана уонна «инбэлиит оҕо» диэн категорияны, группатын быһаарар усулуобуйалар уларыйдылар. Уопсайа, 58 араас ыарыы киллэрилиннэ.
Испииһэккэ хромосомалар уларыйыылара, ол иһигэр Даун синдрома, быар цирроһа, хараҕа суох, истибэт буолуу, оҕо церебральнай баралыыһа киллэрилиннилэр. Сколиозка, сыҥаах-сирэй сайдыытын дьиэктэригэр, аутизмҥа, саахарынай диабекка уо.д.а. оҕо ыарыыларынан инбэлииккэ таһаарыы бэрээдэгэ судургутутулунна.
«Бу уураах инбэлииттэргэ барыларыгар – 12 мөлүйүөн киһиэхэ (ол иһигэр, 651 тыһыынча оҕоҕо) сыһыаннааҕын санатабын», – диэн быһаарда РФ бырабыыталыстыбатын бэрэссэдээтэлин солбуйааччы Ольга Голодец.
Надежда ЕГОРОВА, «Саха сирэ» хаһыат, edersaas.ru