Информационнай бэлиитикэ департамена тэриллиэҕэ

Бөлөххө киир:

Бэчээт күнүн көрсө Ил Дархан Егор Борисов өрөспүүбүлүкэ көрдөрөр-иһитиннэрэр хампаанньатын, хаһыаттар, интернет-сайтар эрэдээктэрдэрин кытта көрүстэ. Көрсүһүүгэ былаас уонна суруналыыстыка аналын, хардарыта үлэлэһии бэрээдэгин, гражданскай уопсастыба уонна аныгы кэмҥэ кырдьыктаах информация туһунан кэпсэттилэр. 

Надежда Самсонова, «Саха сирэ» хаһыат, https://edersaas.ru/

«Үс сүрүн былаас баар, суруналыыстар төрдүс былааспыт диигит, ону көрдөрүҥ, чөл гражданскай уопсастыба сайдыыта эһигиттэн тутулуктаах. Мин санаабар, дириҥ хорутуулаах ырытыы тиийбэт. Политиканство уонна политика диэн өйдөбүллэри эмиэ араарыахха наада«, — диэтэ.

«Саха сирэ» хаһыат сүрүн эрэдээктэрэ Чокуур Гаврильев аныгы кэмҥэ этэрбэс араадьыйата дьону-сэргэни буккуйарыттан дьиксинэрин биллэрдэ. Онуоха Егор Афанасьевич: «Ити кэм көстүүтэ. Аҕыйах сылынан ааһыаҕа. Норуот бэйэтэ муударай. Онон сотору итинник үһү-домох сонуннарга итэҕэйбэт, кырдьыгы эндэппэккэ билэр буолуоҕа,» — диэн бэлиэтээтэ.

Көҥүллүк этии-тыыныы чааһыгар СИА эрэдээктэрэ Вячеслав Стручков чунуобунньуктар өттүлэриттэн суруналыыстары ханнык да ыгыы-түүрүү суоҕун бигэргэттэ. Суруйар эйгэҕэ эдэр дьон аҕыйаҕын, каадыр тиийбэтин, суруналыыстары бэлэмнээһин систиэмэтэ татымын чорботто.

Сахалайф эрэдээктэрэ Софья Булчукей идеология туһунан санаатын үллэһиннэ. Кини этэринэн, сэбиэскэй кэмҥэ идеологияны суруйааччылар олохтууллара, оттон билигин ити оруолу суруналыыстар сүгүөхтэрин наада.

Суруналыыс Виталий Обедин былаас уорганнарын үлэтин сырдатыы быһаччы пресс-сулууспаттан тутулуктааҕын, билигин олор систиэмэтэ суох үлэлииллэрин,  информацияны тиэрдии сороҕор атахтанарын ыйда.  «СМИ сокуонун бары тутуһабыт. Хонтуруоллуур да уорганнар элбэхтэр. Көҥүл саҥа, дьиҥэр, диэн олбуорга тугу баҕараргын, кими баҕараргын суруйуу буолбатах.» — диэтэ.

Егор Борисов, итиннэ даҕатан, Ил Дархан уонна бырабыыталыстыба дьаһалтатын иһинэн информационнай бэлиитикэ департамена тэриллиэҕин туһунан кэпсээтэ. Департамент пресс-сулууспалар үлэлэрин сүрүннүөҕэ, былаас аһаҕас буоларын уонна кириитикэҕэ сөптөөх дьаһалы ылынарын ситиһиэҕэ.

Судаарыстыбаннай СМИ (бюджеттан сакаас быһыытынан үбүлэнэр) уонна чааһынай сайтар, хаһыаттар диэн атааннаһыы баар. Ил Дархан итини адьас сыыһанан аахта. Маныаха «Быһыыны-майгыны араас өттүттэн эргитэ сылдьан ырытыы былааска даҕаны, нэһилиэнньэҕэ даҕаны туһалаах», — диэтэ. Ил Дархан Егор Борисов ханнык баҕарар үлэҕэ кириитикэ, ол аата объективнай сыанабыл уонна кыһалҕаны тобулар суолу ыйыы-кэрдии наадатын бэлиэтээтэ.

Дьоҥҥо-сэргэҕэ информация тиэрдиитигэр 2017 сылтан саҕалаан, грант быһыытынан, чааһынайдарга барар үбүлээһин хас да төгүл улаатыахтаах. Маннык, Ил Дарханы кытта сүрүн эрэдээктэрдэр атах тэпсэн олорон көрсүһүүлэрэ, араас боппуруоһу быһаарсыылара кыбаарталга биирдэ буолуоҕа.

+1
0
+1
0
+1
0
+1
0
+1
0
+1
0
+1
0