Бүгүн Аллайыаха улууһун айылҕа харыстабылын иниспиэктэрдэрэ сарсыарда эрдэ Илин Сибиир муоратыгар айаннаатылар. Кинилэр сыл аайы Россия WWF “Үрүҥ эһэ суолунан ” (“Медвежий патруль”) диэн бырайыагар кытталлар. Дьэ, онон иниспиэктэрдэр Илин Сибиир муоратын кытылынан Хапташинскай ярга тиийиэхтээхтэр. Бу барыта “Кыталык” заказник сиригэр-уотугар киирсэр.
Женни СТРЮКОВА, “Саха сирэ” хаһыат, edersaas.ru
Этэҥҥэ буоллаҕына, Чокуурдаахтан муораҕа диэри 220 км. айанныахтара. Ыраах барар айанньыттар “Кыһыҥҥы маршруту учуоттуур ньыма” диэн кыыл сырыытын үөрэтэр ирдэбили тутуһаллар. Ол быһыытынан, барбыт суолларын хаста даҕаны тэлиэхтээхтэр. Тоҕо диэтэххэ, кинилэр кэннилэриттэн үрүҥ эһэ ааспыт буолуон сөп.
Төннөллөрүгэр иниспиэктэрдэри эмиэ биир итиччэ уһуннаах суол кэтэһэр. Уонна өссө 300-400 км. кэриҥэр үрүҥ эһэни көрдүөхтэрэ, суолун-ииһин булуохтара. Онон кинилэри уопсайа 800 км. усталаах ыраах айан күүтэр. Ол иһин бураннарыгар сөп буолар уматыгы тиэнэ сылдьаллар, ол сүрдээх ыйааһыннаах буолан, айаҥҥа эмиэ күчүмэҕэйдэри үөскэтэр.
Муора кытылыгар баар үүтээҥҥэ мас хомуйан, ону эрбээн оһохторун оттуна-оттуна онно олоруохтара, үлэлиэхтэрэ. Ити эттэххэ эрэ дөбөҥ. Онтон үлэтэ, сырата сүрдээх элбэх.
“Үрүҥ эһэ суолунан” бырайыак кыттыылаахтара туруоруммут сыалларын толорор соруктаахтар.
Женни СТРЮКОВА, “Саха сирэ” хаһыат, edersaas.ru