Аҕыйах хонуктааҕыта Мэҥэ Хаҥалас улууһун Хара нэһилиэгэр өрөспүүбүлүкэ бөдөҥ судаарыстыбаннай уонна политическай диэйэтэлэ, 1965 ‒ 1972 сс. Саха АССР Миниистирдэрин Сэбиэтин бэрэссэдээтэлин бастакы солбуйааччы, 1972 ‒ 1992 сс. РСФСР бырабыыталыстыбатыгар Саха сирин бастайааннай бэрэстэбиитэлэ, 1989 ‒ 1991 сс. ССРС народнай дьокутаата, «Бочуот Знага» уордьан кавалера, РСФСР култууратын үтүөлээх үлэһитэ, Саха АССР норуот хаһаайыстыбатын үтүөлээх үлэһитэ, Саха Өрөспүүбүлүкэтин, Москва, Дьокуускай куораттар, Алдан оройуонун, Мэҥэ Хаҥалас улууһун, Хара нэһилиэгин бочуоттаах гражданиннара Иннокентий Гаврилович Игнатьев үтүө аатын Хара орто оскуолатыгар иҥэрии үөрүүлээх сиэрэ-туома буолла.
Иннокентий Гаврилович аатыгар өйдөбүнньүк дуосканы үөрүүлээхтик арыйыыга «Хара нэһилиэгэ» МТ баһылыга Дария Назарова сүдү киһибит аатын түһэн биэрбэттик үчүгэйдик үөрэниэхтээхпит, күүстээхтик үлэлиэхтээхпит диэн оскуола кэлэктиибигэр уонна үөрэнээччилэргэ туһаайан эттэ.
Дьокутааттар улуустааҕы Сэбиэттэрин бэрэссэдээтэлэ Андрей Находкин өрөспүүбүлүкэ сайдыытыгар сүҥкэн кылаатын киллэрбит киэн туттар биир дойдулаахпыт аатын үйэтитэргэ Ил Дархан дьаһала тахсыбытын эттэ итиэннэ кинини үйэтитиигэ бастакы хардыынан өйдөбүнньүк дуосканы арыйыы буолар диэтэ. Кэнэҕэһин өйдөбүнньүк, сквер оҥоһуутугар күүспүтүн түмэн үлэлэһиэхпит диэн эттэ.
1947 сыллаахтан олохтон туоруор диэри эн-мин дэсиһэн алтыспыт чугас доҕоро, РФ уонна СӨ физическэй култуура үтүөлээх үлэһитэ, Саха АССР үтүөлээх тренерэ Валерий Кочнев, Иннокентий Гаврилович быраата Александр Игнатьев уонна балта Надежда Федорова истиҥ ахтыылары оҥордулар. Аймахтар ааттарыттан кинилэр оскуолаҕа улахан тэлэбиисэри, И.Г.Игнатьев аатынан сэттис өрөспүүбүлүкэтээҕи хайыһар күрэхтэһиитин сүрүн бирииһин ‒ ноутбугу уонна «Хара нэһилиэгэ» МТ дьаһалтатыгар өҥнөөх принтери туттардылар.
Оскуолаҕа Иннокентий Игнатьев олоҕун, үлэтин-хамнаһын кэпсиир истиэндэ саамай көстүүлээх сиргэ туруоруллубут. Түмэлгэ киниэхэ анал муннугу оҥорбуттарын көрдөрдүлэр. Ыалдьыттарга анаан үөрэнээччилэр бэртээхэй кэнсиэри бэлэхтээтилэр.
Бу күн Ураһалаах алааска хайыһарга Саха Өрөспүүбүлүкэтин кубогын сэттис түһүмэҕэ И.Г.Игнатьев сырдык аатыгар ананан ыытылынна.
Виктория БЕЛОЛЮБСКАЯ, Мэҥэ Хаҥалас.