Таатта улууһун Уолба сэлиэнньэтигэр 2003-2005 сс. төрөөбүт уолаттар икки ардыларыгар көҥүл тустууга Таатта улууһун бочуоттаах гражданина, СӨ үтүөлээх тренерэ, бэтэрээн-маастардарга аан дойду чөмпүйүөнэ Иннокентий Семенович Кочкин бирииһигэр өрөспүүбүлүкэтээҕи турнир ыытылынна.
Петр ПАВЛОВ, “Саха сирэ”, edersaas.ru
Күрэхтэһиигэ Чурапчыттан (спортивнай-интэринээт оскуола, Төлөй, Арыылаах), Эбээн-Бытантайтан, Хаҥаластан, Мэҥэ Хаҥаластан, Томпоттон (Кириэс Халдьаайы, Сайдыы, Хаандыга, Мэҥэ Алдан), Намтан, Дьокуускайтан уонна Таатта улууһун нэһилиэктэриттэн барыта 127 эдэр бөҕөс күөн көрүстэ. Кылаабынай судьуйанан СӨ спорка маастара Егор Дмитриевич Малышев үлэлээтэ.
Икки күннээх күрэхтэһии түмүгүнэн бэйэлэрин ыйааһыннарыгар кыайыылаахтарынан буоллулар: 23 кг – Эрчим Жирков (ДЮСШ-3), 28 кг – Ярик Осипов (Хаҥалас), 30 кг – Виталий Пудов (Чурапчы), 32 кг – Коля Захаров (Нам), 35 кг – Петя Гуляев (Мэҥэ Хаҥалас), 38 кг – Вова Васильев (ДЮСШ), 42 кг – Ваня Потапов (Чурапчы), 46 кг – Максим Уколов (ДЮСШ-3), 50 кг – Володя Бояновскай (Чурапчы), 55 кг – Коля Спиридонов (Чурапчы), 60 кг – Володя Давыдов (ДЮСШ-3).
Күрэхтэһии тэриллиитигэр сүрүн көмөнү оҥордулар: И.С.Кочкин иитиллээччитэ, көҥүл тустууга ССРС спордун маастарыгар хандьыдаат, билигин предпринимателинэн үлэлиир Виктор Анатольевич Галевич, Таатта улууһун баһылыга Михаил Михайлович Соров, Уолба нэһилиэгин баһылыга Василий Петрович Рахлеев, И.Г.Федосеев аатынан оҕо спортивнай оскуолатын дириэктэрэ Егор Егорович Ноенохов, Таатта улууһун спорка кэмитиэтин бэрэссэдээтэлэ Гаврил Гаврильевич Вырдылин уонна да атыттар.
Бу турнир 1999 сыллааҕы 30 киилэҕэ кыайыылааҕа – норуоттар икки ардыларынааҕы кылаастаах спорт маастара, Европа уонна аан дойду чөмпүйэнээттэрин призера Владислав Андреев турнир бочуоттаах ыалдьытынан буолла. Күрэхтэһии кэмигэр кини эдэр тустууктарга бэйэтин уопутуттан үллэстэн маастар-кылаас биэрдэ.
Петр ПАВЛОВ, “Саха сирэ”, edersaas.ru