Сайтпытыгар сэтинньи 17 күнүгэр ««Сатал» бэрэссэдээтэлэ Иннокентий Макаров сураҕа суох сүттэ» диэн иһитиннэриигэ биллиилээх спортсмен, кикбоксиҥҥа аан дойду үс төгүллээх чөмпүйүөнэ Иннокентий Макаров сураҕа суох сүппүтүн туһунан суруйбуппут. Кинини бүтэһигин сэтинньи 5 күнүгэр көрбүттэр этэ.
РФ Силиэстийэлиир кэмитиэтин Саха сиринээҕи управлениета ити чахчынан РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэрийбитэ.
Иннокентий Макаров — «Сатал» СОНТ бэрэссэдээтэлэ. Сураҕа суох сүтээтин кытта, кини чугас дьоно полицияҕа тыллаабыттар.
News.Ykt.Ru суруйарынан, Макаров өлүгүн Бүлүүлүүр суол ойууруттан булбуттар. Кинилэргэ эрийбит «источник» кэпсээбитинэн, сэтинньи 5-6 күннэригэр Макаров билэр киһитиниин чааһынай дьиэҕэ арыгылаабыттар. Ол олорон, кыыһырсыы түмүгэр, ол киһи Макаровы быһаҕынан анньыбыт.
Бу ыар буруйу оҥорууга уорбаланан, Дьокуускай куорат 36 саастаах олохтооҕо тутуллубут.
РФ Силиэстийэлиир кэмитиэтин Саха сиринээҕи управлениета өлүк көстүбүтэ чахчытын-суоҕун туһунан комментарий биэрэртэн аккаастанна.
Биһиги корр., «Саха сирэ» хаһыат, edersaas.ru
Хаартыска: интэриниэттэн.