Сайтпытыгар бэҕэһээ, сэтинньи 22 күнүгэр, «Иннокентий Макаров өлүгэ көһүннэ» диэн иһитиннэриибит бэчээттэммитэ. Онно бу дьыл сэтинньи 5 күнүгэр сураҕа суох сүппүт биллиилээх спортсмен, кикбоксиҥҥа аан дойду үс төгүллээх чөмпүйүөнэ Иннокентий Макаров өлүгэ көстүбүтүн туһунан суруйбуппут.
«Сатал» СОНТ бэрэссэдээтэлэ Макаров өлүгүн Бүлүүлүүр суол ойууруттан булбуттара. Сабаҕалааһын быһыытынан, Макаров билэр киһитиниин чааһынай дьиэҕэ арыгылаабыттар. Ол олорон, кыыһырсыы түмүгэр, ол киһи Макаровы хаста да быһаҕынан анньан өлөрбүт.
Бу ыар буруйу оҥорууга уорбаланан, Дьокуускай куорат 36 саастаах олохтооҕо тутуллубута.
РФ Силиэстийэлиир кэмитиэтин Саха сиринээҕи управлениета ити чахчынан РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэрийэн силиэстийэлиир эрээри, күн бүгүҥҥэ диэри бу дьыала хаамыытынан биир да официальнай иһитиннэрии биэрэ илик.
Бүгүн nvk-online.ru иһитиннэрбитинэн, полиция оперативниктара Иннокентий Макаровы өлөрүүгэ сыһыаннаах иккис уорбаланааччыны туппуттар. Сабаҕалааһын быһыытынан, бу иккис уорбаланааччы өлүгү ойуурга илдьибит, ханна кистээбитин көрдөрбүт. НВК-Онлайн ону туоһулуур эксклюзивнай видеоны көрдөрдө.
Уорбаланааччылар — 1981 уонна 1966 сыллаах төрүөх дьон — өлүгү Бүлүүлүүр суол 45-с километрыгар суолтан 30 м ыраах сиргэ илдьибиттэр.
Биһиги корр., «Саха сирэ» хаһыат, edersaas.ru
Видео: http://nvk-online.ru