close
Иннокентий Макаровы өлөрүүгэ уорбаланааччы хаайылынна (ВИДЕО)...
· - Бэрээдэк - Олох-дьаһах

Иннокентий Макаровы өлөрүүгэ уорбаланааччы хаайылынна (ВИДЕО)

Сайтпытыгар бэҕэһээ, сэтинньи 23 күнүгэр, «Иннокентий Макаровы өлөрүүгэ иккис уорбаланааччы тутулунна»  диэн иһитиннэриибит бэчээттэммитэ. Онно бу дьыл сэтинньи 5 күнүгэр  сураҕа суох сүппүт биллиилээх спортсмен, кикбоксиҥҥа аан дойду үс төгүллээх чөмпүйүөнэ Иннокентий Макаровы өлөрүүгэ сыһыаннаах иккис киһи тутуллубутун туһунан суруйбуппут.

edersaas.ru


Силиэстийэ эксперименин кэмигэр.

Санатар буоллахха, «Сатал» СОНТ бэрэссэдээтэлэ Иннокентий Макаров сэтинньи 5 күнүттэн сураҕа суох сүппүтэ.

Сэтинньи 13 күнүгэр силиэстийэ уорганнара РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэрийбиттэрэ.

Сэтинньи 22 күнүгэр Макаров өлүгүн Бүлүүлүүр суол ойууруттан булбуттарын туһунан иһитиннэрии тарҕаммыта.  Сабаҕалааһын быһыытынан, Макаров билэр киһитиниин чааһынай дьиэҕэ арыгылаабыттар. Ол олорон, кыыһырсыы түмүгэр, ол киһи Макаровы хаста да быһаҕынан анньан өлөрбүт.

Бу ыар буруйу оҥорууга уорбаланан, бастакынан сэтинньи 22 күнүгэр Дьокуускай куорат 36 саастаах олохтооҕо тутуллубута.

Онтон бэҕэһээ, nvk-online.ru иһитиннэрбитинэн, полиция оперативниктара Иннокентий Макаровы өлөрүүгэ сыһыаннаах иккис уорбаланааччыны туппуттар. Сабаҕалааһын быһыытынан, бу иккис уорбаланааччы өлүгү ойуурга илдьибит, ханна кистээбитин көрдөрбүт. НВК-Онлайн ону туоһулуур эксклюзивнай видеоны көрдөрбүтэ.

Уорбаланааччылар — 1981 уонна 1966 сыллаах төрүөх дьон — өлүгү Бүлүүлүүр суол 45-с километрыгар суолтан 30 м ыраах сиргэ илдьибиттэр.

Бу ураты ыар буруйу полиция оперативниктара хайдах арыйбыттарын туһунан СӨ ИДьМ-тын пресс-сулууспата иһитиннэрдэ.

Силиэстийэ эксперименин кэмигэр.

СӨ Ис дьыалаҕа министиэристибэтин пресс-сулууспата: 

— Сэтинньи 10 күнүгэр Дьокуускай куорат полициятыгар 42 саастаах киһи сүппүтүн туһунан аймахтара сайабылыанньа суруйбуттар. Силиэстийэ уорганнара «киһини соруйан өлөрүү» ыстатыйанан холуобунай дьыала тэрийбиттэрин кэнниттэн, холуобунай ирдэбил оперативниктара киэҥ далааһыннаах суһал-ирдиир тэрээһиннэри ыыттылар.

Баар биэрсийэни барытын бэрэбиэркэлээн, сүппүт киһи олорор сиригэр («Сатал» СОНТ) 1000 кэриҥэ тэлгэһэни көрөн-үөрэтэн, кини билэр дьонун, бизнескэ партнердарын, ыалларын уо.д.а. кытта кэпсэппиттэр, ыйыталаспыттар.

Ол түмүгэр, буруйу оҥорууга сыһыаннаах буолуон сөп киһи массыынатын булбуттар. Онтон уорбаланааччылар суолларын таба тайаммыттар. Бастаан ханна да үлэлээбэт 35 саастаах киһи тутуллубута. Онтон кини 51 саастаах аймаҕа тутуллубута. Бу иккис уорбаланааччы буруйу кистииргэ көмөлөспүт.

Сүппүт киһи өлүгүн оперативниктар сэтинньи 22 күнүгэр Бүлүүлүүр суол 45-с километрыгар булбуттара.

РФ Силиэстийэлиир кэмитиэтин Саха сиринээҕи управлениета:

— Сэтинньи 13 күнүгэр тэриллибит холуобунай дьыала силиэстийэтэ салҕанан барар.

Сэтинньи 22 күнүгэр бу буруйу оҥорууга уорбаланан, Хаҥалас улууһун Ой сэлиэнньэтин 1981 сыллааҕы төрүөх олохтооҕо тутуллубута. Буруйу хайдах оҥорбутун туһунан көрдөрүү биэрбитэ. Сэтинньи 23 күнүгэр уорбаланааччыга буруй тиксэриллибитэ.

Маны таһынан, өлүгү кистээһиҥҥэ көмөлөспүт 1966 сыллааҕы төрүөх киһи кимэ быһаарыллыбыта. Бу киһиэхэ туһуланан, РФ Холуобунай кодексатын 316-с ыстатыйатынан (буруйу кистээһин) холуобунай дьыала тэриллибитэ.

Онтон бэҕэһээ, сэтинньи 23 күнүгэр, Дьокуускай куорат федеральнай суута Иннокентий Макаровы өлөрүүгэ уорбаланааччыга силиэстийэ кэмигэр хааччахтыыр миэрэ быһыытынан, Силиэстийэлиир изоляторга хаайар туһунан миэрэ туттубута.

Биһиги корр., «Саха сирэ» хаһыат, edersaas.ru

Видео: http://nvk-online.ru

Хаартыскалар: РФ Силиэстийэлиир кэмитиэтин Саха сиринээҕи управлениета.

#бүгүн: 1
2
3

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

два × 3 =