Интеллектуальнай оонньуулартан үгүс уопуту иҥэриннибит

Ааптар: 
Бөлөххө киир:

Биир нэдиэлэ устата барбыт I Интеллектуальнай оонньуулар түмүктэннилэр. Маҥнайгы сыалын-соругун ситтэ – тэрээһин ыытылынна. Кэлбит ыалдьыттар Арассыыйа, Саха сирин туһунан үгүһү биллилэр. Оттон биһиги оҕолорбут сайдыылаах дойдулар оҕолоруттан элбэххэ үөрэннэхтэрэ, туһалааҕын иҥэриннэхтэрэ. Өрөспүүбүлүкэ, үөрэх салайааччылара туох санаалаах эбиттэрий?

Сахамедиа, edersaas.ru

Владимир Солодов, СӨ бырабыыталыстыбатын бэрэссэдээтэлин эбээһинэһин толорооччу:

— Биһиэхэ урут буолбатах тэрээһин ыытылынна. Бастатан туран, олус интэриэһинэй дьону мустубут. 17 дойдуттан оҕолор кэлэн кытыннылар. Айдарыылаах оҕолору кытта салгыы хайдах үлэлиир систиэмэни тобуллубут. Норуоттар икки ардыларынааҕы таһымнаах экспертэртэн үгүс уопуту иҥэриннибит. Оттон биһиэхэ кэлбит кыттааччыларга Арассыыйа, Саха сирин туһунан үтүө өйдөбүл өйдөрүгэр-санааларыгар хааларыгар эрэнэбин. Биһиги оҕолорбут норуоттар икки ардыларынааҕы хамаандаҕа үлэлиир уопуту ыллылар.

Андрей Петров, РФ Үөрэх министиэристибэтин Уопсай үөрэхтээһин судаарыстыбаннай бэлиитикэтин департаменын дириэктэрэ:

— Оонньуу таһыма үрдүк. Манна аныгы кэмҥэ ирдэнэр дипломатия, 3D-моделирование, робототехника, о.д.а. бары бааллар. Соторутааҕыта дойду бэрэсидьиэнэ Владимир Путин үөрэх хаачыстыбатынан аан дойдуга 10 бастыҥнар кэккэлэригэр киириэхтээхпит диэн сорук туруорбута. Манна кыттар биһиги оҕолорбут тас дойдуттан кэлбит бэйэлэрин саастыылаахтарын үрдүк таһымнарын көрөн, биһиэхэ киэҥник тарҕана илик хайысхаларга үөрэнэллэр. Биһиги базовай биридимиэттэргэ чиҥ билиибит баар. Ол эрээри, тас дойдулар инники хардыылаан иһэр чопчу суолларыгар үөрэниэхпитин наада. Дьэ ону олоххо киллэрэргэ Дьокуускайга ыытыллыбыт Оонньуулар көдьүүстэрэ улахан. Биллэн турар, биһиги өйүөхпүт, атын эрэгийиэннэргэ бу уопуту тарҕатыахпыт.

Владимир Егоров, СӨ үөрэҕин уонна наукатын миниистирэ:

— Быһаарыы ылынылла илик эрээри, Интеллектуальнай оонньуулар тиһигин быспакка ыытыллалларыгар эрэнэбит. Мин санаабар, Олимпийскай оонньуулар курдук, түөрт сылга биирдэ тэриллэрэ ордук табыгастаах этэ.

Симпозиум кэмигэр элбэх идиэйэ, этии киирдэ. Манна кэлбит үөрэх тэрилтэлэрин эрэ кытта буолбакка, тыа сирин уонна талааннаах оҕолору кытта үлэһэр хайысхалаах норуоттар икки ардыларынааҕы ситимнэри кытта сибээһи олохтоотубут. Холобура, МИЛСЕТ курдук бөдөҥ тэрээһин. Канада, Венгрия, Италия, Турция, Мексика, о.д.а. улахан научнай-үөрэтэр ситимнэр кэлэн бардылар. Ону таһынан, Оонньууларга кэлбит үрдүк квалификациялаах экспертэр көмөлөрүнэн өрөспүүбүлүкэбит үөрэҕин систиэмэтин сайдыытын көрдүбүт.

Людмила ПОПОВА, “Саха сирэ”, edersaas.ru

Андрей СОРОКИН (СИА) хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0