Эдэр сырыттахха, киһи араас «авантюраҕа» дэбэҕэстик киирэн биэрэр. Туох содуллаах буолуон сөбүн туһунан ол түгэҥҥэ толкуйдаабаккын.
Хаҥалас улууһугар икки кыыс бириэмэтин үөрэ-көтө атаарыан баҕаран, биир сууккаҕа кыбартыыра куортамнаабыт. Сити күн кинилэргэ ыалдьыттыы диэн, Дьокуускай куораттан икки уол тигинэтэн кэлбит. Бу уолаттары кытта кыргыттар ити күн эрэ иннинэ интэриниэтинэн билсибиттэр.
Итинник көрсүһүүлэргэ буоларын курдук, билсиһиилэрин итирдэр утаҕынан бэлиэтээбиттэр.
Онтон бары утуйбуттарын кэнниттэн, биир уол өр саарыы барбакка, кыргыттар көстүүгэ сытар суотабай төлөпүөннэрин ылбыт уонна атаһын уһугуннаран, иккиэн атахха биллэрбиттэр.
Кыргыттар сарсыарда уһуктан көрбүттэрэ — уолаттара да суохтар, төлөпүөннэрэ да мэлигир. Уопсайа 28 тыһ. солк. суумалаах хоромньу оҥоһуллубут. Тута полицияҕа тыллаабыттар.
Оперативниктар уорбаланааччыны туппуттар — Үөһээ Бүлүүттэн төрүттээх 26 саастаах уол эбит.
Бу туһунан уонна «уоруу» ыстатыйанан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Кыргыттар, бука диэн, хаһан да харахтаабатах билбэт дьоҥҥутун кытта онно-манна барсымаҥ, бэйэҕитигэр ыҥырымаҥ! Оннук көрсүһүүлэр тугунан диэлийэн тахсыахтара биллибэт. Уордарыы диэн — ити өссө кырата, араас куһаҕаҥҥа түбэһиэххэ сөп. Билиҥҥи үйэҕэ киһи билэр да дьонуттан күүппэтэҕин көрүөн сөп. Ону өйдүүргүт буоллар!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.