Өлүөнэни туоруур кыһыҥҥы суол сабыллан, муус устар 18 күнүттэн сымнаҕас сыттыктаах суудуналар пассажирдары таһыахтара. Бу туһунан СӨ Тырааныспарын уонна суол хаһаайыстыбатын министиэристибэтэ иһитиннэрдэ.
Анивера Акимова, «Саха сирэ» хаһыат, https://edersaas.ru/
Суол сабыллыбытын үрдүнэн, Дьокуускай – Аллараа Бэстээх хайысхатынан уора-көстө массыынанан туорааччылар син биир бааллар. Ол эрээри экстремал-суоппардар туһааннаах уорганнар харахтарын далыгар киирдэхтэринэ, ыстарааптаныахтара. Бүгүн эбиэт кэннэ Даркылаахтан сымнаҕас сыттыктаах суудуна, норуокка киэҥник биллэринэн, «Ирбис» бастакы боруобалааһын сырыытын оҥоруоҕа. Онтон сарсыҥҥыттан пассажир төһө элбэҕиттэн көрөн, нөҥүө кытылга айаннааччылары таһыаҕа.
Даркылаахтан — Аллараа Бэстээххэ диэри сыана 1000 солкуобайынан быһыллыбыт. Ол эрээри муус хамсаатаҕына, тарыып 2000 солкуобайга диэри үрдүөҕэ.
Анивера Акимова, «Саха сирэ» хаһыат, https://edersaas.ru/