Россия Федерациятын Бырабыыталыстыбата 2017 сыл бүтүүтэ ылыммыт уурааҕынан, кэккэ уларыйыылар киирдилэр, ол иһигэр тыа хаһаайыстыбатын сирдэрин туһаныыга сыһыаннаах уларыйыы эмиэ баар. edersaas.ru
Сэтиэнэхтэн уонна хаппыт сыыс оттон өрт уота баран, ойуурга итиэннэ нэһилиэнньэлээх пууннарга суоһуурун бохсор сыалтан, 2018 сылтан сири туһанааччылар сыһыарыллыбыт ходуһаларын сыллата оттууллара итиэннэ бааһыналара сыыс ото суох буоларын хааччыйаллара ирдэннэ.
Кэлиҥҥи сылларга орто уонна дьоҕус урбаан тэрилтэлэрин, биирдиилээн урбаанньыттары, ол иһигэр бааһынай хаһаайыстыбалары былааннаахтык бэрэбиэркэлээһин тохтотуллан турар. Кинилэр үлэлэриттэн тулалыыр эйгэҕэ туох эмит хоромньу тахсыан сөптөөх эбэтэр тахсыбыт түбэлтэтигэр, борокуратуура сөбүлэҥинэн эрэ былааны таһынан бэрэбиэркэ ыытыллара. Оттон билигин, Уоттан сэрэхтээх буолуу быраабылаларыгар саҥа уларыйыы киллэриллибитинэн, сыыс отунан бүрүллүбүт бааһыналары, охсуллубатах биитэр ситэ оттоммотох ходуһалары былааны таһынан бэрэбиэркэлээһин судургутуйда. Ыстарааба да ботуччу буолла. Холобур, биир эмит учаастагын ситэ оттооботох бааһынай хаһаайыстыба 50 тыһ. солк. уонна онтон үөһээ кээмэйдээх ыстараапка ыйаныан сөп.
Тыа хаһаайыстыбатын сирин туһанааччылар, түүлэһээччилэр итиэннэ бас билээччилэр, ходуһаҕытын уонна бааһынаҕытын сыллата аналынан туһаныҥ, ыстараап хабалатыгар кииримэҥ!
Максим АФАНАСЬЕВ,
«Россельхознадзор» Саха сиринээҕи управлениетын отделын начаалынньыгын солбуйааччы,
edersaas.ru сайтка анаан.