Ирина Бурцева: “Миитин туох сыаллаах-соруктаах оҥоһулларын ыччат бэйэтэ да билбэт” (ЭКСПЕРТ САНААТА)
Бэҕэһээ Дьокуускай куоракка, атын куораттары сэргэ Алексей Навальнайы өйүүр аахсыйа буолан ааста. Дьон Доҕордоһуу болуоссатыгар тахсан, көҥүлэ суох миитини тэрийбитин итиннэ эдэр дьон тутуллубутун туһунан социальнай ситимнэргэ киэҥник тарҕанна. edersaas.ru
Ирина Бурцева, СӨ Профсойуустарын федерациятын ыччакка сэбиэтин бэрэссэдээтэлэ:
– Алтынньы 7 күнүгэр, ыччат Навальнайы өйүүр көҥүлэ суох миитиҥҥэ тахсыбыт.
Ити күн Профсойуус көхтөөх ыччата – араас эйгэ үлэһиттэрэ уонна өрөспүүбүлүкэ үөрэҕин кыһаларын устудьуоннара “За достойный труд!” диэн бүтүн аан дойдутааҕы хамсааһын күнүгэр аналлаах бүтүн Арассыыйатааҕы аахсыйаҕа кыттан, Дьокуускай киин уулууссатынан транспораннардаах хаампыппыт. Ленин болуоссатыгар мустан флешмоб оҥорон, дьон сэргэ көҕүлүн ылбыппыт. Демократия, ол аата барыта көҥүллэнэр диэн өйдүүр сыыһа. Биһиги, профсойуус ыччата, бэйэбит бырааппыт туһугар өрүү ыллыктаахтык толкуйдаан, сокуон чэрчитинэн туруулаһабыт. Бэйэбит этиилэрбитин барытын ырытан көрөн уонна олохтоохтук толкуйдаан оҥоробут. Ол иһин профсойуустар үлэлээбит сылларын тухары былааһы кытта икки өттүттэн өйдөһөн, хамсаныылаах кэпсэтиилэри, хамсааһыннары оҥордохторо.
Навальнайы өйүүр тэрээһиҥҥэ кэлбит ыччат бэйэтэ тэриммит бөлөҕө буолбатаҕа буолуо. Оҕолор уонна устудьуоннар, мин санаабар, ити туох сыаллаах, соруктаах оҥоһуллубут миитин буоларын билбэттэрэ да буолуо. Ол эрээри, син биир миитиҥҥэ тиийбиттэр. Билиҥҥи социальнай ситимнэр, интэриниэт дьайыыта буолуон сөп. Ыччаты хайдах, туох диэн ыҥырбыттарын биһиги билбэппит. Ол иһин төрөппүттэри уонна устудьуоннары кытта үлэлэһэр дьон билигин итиннэ улахан болҕомтолорун ууруохтаахтар. Аныгы кэм ыччата информация ортотугар сылдьар. Ити информацияттан бэйэтигэр сөптөөҕү эрэ ылыахтаах дии саныыбын.
Людмила ПОПОВА, “Саха сирэ” хаһыат, edersaas.ru