Бүгүн Саха Өрөспүүбүлүкэтин чулуу уола, биллиилээх судаарыстыбаннай уонна уопсастыбаннай-политическэй деятель Исидор Бараахап төрөөбүтэ 120 сылыгар аналлаах үөрүүлээх миитин Үөһээ Бүлүү Харбалааҕар буолла. Бу тэрээһиҥҥэ улуус олохтоохторо эрэ буолбакка, Нам, Таатта, Бүлүү уонна Ньурба улуустарыттан делегациялар кыттыбыттара элбэҕи туоһулуур.
edersaas.ru
Үөрүүлээх миитин иннинэ, Бараахап аатынан мусуойу көрүү-истии буолла. Харбалаах орто оскуолатын үөрэнээччилэрэ Коля Николаев, Коля Чыбыков, Тимур Семенов Исидор Бараахап оҕо сааһыттан саҕалаан, оскуолаҕа, семинарияҕа хайдах үөрэммитигэр тиийэ олус ылыннарыылаахтык кэпсээбиттэрин кэлбит дьон олус сэргээн иһиттилэр.
Нам улууһун Хатырык нэһилиэгэр баар М.Аммосов аатынан судаарыстыбаннас мусуойун научнай үлэһитэ Станислав Дьяконов мусуой уонна Аммосов туһунан кэпсээбитэ эмиэ ураты буолла.
Исидор Бараахап олорон ааспыт олоҕун, үлэтин билсии кэнниттэн уопсастыбаннас миитинэ буолла. СӨ бырабыыталыстыбатын бэрэссэдээтэлин солбуйааччы, Исидор Бараахап төрөөбүтэ 120 сылыгар аналлаах үбүлүөйдээх тэрээһиннэри ыытар өрөспүүбүлүкэтээҕи хамыыһыйа бэрэссэдээтэлэ Михаил Гуляев: “Убаастабыллаах Үөһээ Бүлүү улууһун олохтоохторо, ыраахтан кэлбит ыалдьыттар, барыгытын Саха сирин уһулуччулаах судаарыстыбаннай деятелэ, Саха сирин инникитин төрүттэспит Исидор Бараахап төрөөбүтэ 120 сылынан Ил Дархан Егор Борисов, өрөспүүбүлүкэ бырабыыталыстыбатын ааттарыттан итиитик-истиҥник эҕэрдэлиибин! Саха дьоно маннык уһулуччулаах Исидор Бараахап, Максим Аммосов, Платон Ойуунускай, Степан Аржаков, Степан Васильев курдук дьон ааттарынан киэн туттуон туттар. Кинилэр баар буолан, саха өрөспүүбүлүкэтэ баай, ураты историялаах, сайдыылаах. Кинилэр Сахабыт сирин төрүттэспит, эйэлээх олоҕу аҕалыыга туруорсубут өҥөлөрө хаһан умнуллуо суоҕа”, — диэн эттэ.
Салгыы Үөһээ Бүлүү улууһун баһылыга Владимир Поскачин, Харбалаах нэһилиэгин баһылыга Илья Кузьмин уонна ыҥырыылаах ыалдьыттар ааттарыттан Таатта улууһун Чөркөөх орто оскуолатын дириэктэрэ Роман Обоюкин эҕэрдэ тылы эттилэр.
Салгыы Харбалаахтааҕы мусуой аактабай саалатыгар Нам, Таатта, Бүлүү, Ньурба уонна Үөһээ Бүлүү улууһун ыччаттара “Саха сирин автономиятын төрүттээччилэр сыдьааннарабыт” диэн тиэмэлээх “төгүрүк остуолга” тула мунньустан, Саха сирэ инникитин түстээбит судаарыстыбаннай деятеллэрин ааттарын салгыы үйэтитиигэ хайдах былааннаахтык үлэлиир туһунан кэпсэттилэр, санаа атастастылар.
Бүгүн 3 чааска оройуоннааҕы култуура дьиэтигэр Исидор Бараахап төрөөбүтэ 120 сылыгар аналлаах уопсастыбаннас үөрүлээх мунньаҕа буолуоҕа.
Александр Тарасов, Үөһээ Бүлүү, edersaas.ru сайтка анаан