Көҥдөй истиэнэ нөҥүө хас ытырдалларын, кэпсэтэллэрин истэбит…

Бөлөххө киир:

Дьон саҥа дьиэ атыылаһан баран истиэнэ нөҥүө ыаллара тугу кэпсэтэллэрин, хаста ытырдалларын, оҕолоро сүүрэрин барытын субу тутан олорор курдук истэбит диэн кэпсэтэллэрин үгүстүк истэбин. Үйэлэрин тухары ипотекаҕа киирэн баран, хайыахтарай, айдааннаах ыаллар түбэстэхтэринэ, тулуйалларыгар тиийэллэр. Саҥа дьиэҕэ перфоратор дыыгынас тыаһа, өрөмүөн оҥорон тоҥсуйан, кэлин хобулуктаах түүппүлэнэн тобугурайыы дьиэлээхтэр олохторун доҕуһуоллуур. 

edersaas.ru

Билигин саҥа дьиэлэри конструктор курдук бэрт түргэнник тутан таһаараллар. Дьон бетон эркиннээх кураанах кыбартыыраны бэйэлэрэ хайдах сатыылларынан, кумааһынньык төһө халыҥынан көрөн оҥостоллор. Ол эрэн, өрөмүөн оҥорор саҕана тастан киирэр тыаһы-ууһу кыччатар, ­хаачыстыбалаах матырыйаалы туттар туһунан ким да санаабат.

Мин бүгүн куорат саҥа тутулла турар 203 микро-оройуонугар тиийэн, олохтоохтор туох санаалаахтарын билистим.

Бастаан 12-с куорпуска сырыттым. Ааны орто саастаах эр киһи арыйда, хаһыаттан кэллим диэбиппин, аатын этэртэн туттунна эрээри, кэпсэтэртэн аккаастаммата:

“Биһиги манна көһөн киирбиппит икки сыл буолла. 112 сериялаах дьиэҕэ куукунаҕа гаас турбата ааһар сиригэр көҥдөй хоруопка баар, онно салгын оонньуур хайаҕастаах, ол нөҥүө аллараа-үөһээ олорор ыаллар тугу кэпсэтэллэрэ чуумпуга олох чуолкайдык иһиллэр. Розетка нөҥүө дьон саҥата киирэр, түүнүн муннулара хаһыҥырыыр. Ол эрэн, айдааннаах ыаллар суохтар, бары бэрээдэктээхтэр. Биһиги бары дьиэнэн батсаапка бөлөхтөөхпүт, онон, аһары өр перфораторынан дьөлө үүттээн, киэһэ хойут тыаһаан-­ууһаан мэһэйдээри гыннахтарына, тохтотобут”, — диэн эттэ.

Подъезтан тахсан иһэн паапка кыбыныылаах, ачыкылаах эр киһи киирэн иһэрин көрсө түһэн, кэпсэттим: “Биһиги сэттис этээскэ олоробут, тула өттүбүтүттэн, ойоҕос истиэнэттэн, үөһэттэн, алларааттан тугу кэпсэтэллэрэ, сөтөллөллөрө, оҕолор сүүрэллэрэ-көтөллөрө, мэниктииллэрэ, ­миэбэли сыҕарыталлара, бэл тахсан киирэн баран ууну түһэрэллэрэ кытта иһиллэр. Хата ыалларбыт бэрээдэктээх буолан, кыра тыастаахтар, уолу-кыыһы мунньан, түүннэри муусука холбоон ньиргийбэттэр. Утуйар кэмҥэ утуйаллар. Дьиэбитин ипотеканан кирэдьиит ылбыт буолан, ханна көһүөхпүтүй, тулуйабыт эрэ”.

Эмиэ ити микро-оройуоҥҥа 6-с куорпуска куортамнаан олорор эдэр кыыс, хас ытырдаллара, скрипкаҕа оонньууллара барыта иһиллэ турарын эттэ.

Билигин үксэ бетон эркиннээх дьиэни атыылыыллар, ону муостаҕа тугу да тэлгээбэккэ, кафель, эбэтэр керамогранит билиитэни сыһыардахха, дьон хаамара аллараа курдары иһиллэ туруо.

Аны билигин дьон харчылаах өттө дьиэлэригэр дизайнерскай өрөмүөн оҥостоллор. Хос икки ардынааҕы истиэнэни көтүрэн баран, гипсокартонунан эҥин-­араас арка, светильниктаах истиэнэ оҥорторон, быыс иһэ көҥдөй буолан, дьон саҥатын ой дуорааннатан, өссө күүһүрдэн биэрэр.

Итинник саҥа дьиэлэргэ хас саҥарбытыҥ барыта аттынааҕы ыалларгар иһиллэ турбатын туһугар эппиэтинэһи ким сүгэрий диэн тустаах тэрилтэлэртэн ыйыталастым.

МУП «АРТ», ДСК, «Спецснаб» о.д.а. тутуу хампаанньалара, бигэргэммит бырайыак быһыытынан тутабыт, дьон киириэн иннинэ эбийиэктэр бары хас да хамыыһы­йаны, тустаах бэрэбиэркэни ааһаллар диэн этэллэр. Дьиэ бырайыагын оҥорорго олохтоохтор тыаска-ууска мэһэйдэппэттэрин курдук оҥороллор дииллэр. Ол эрэн, элбэх кыбартыыралаах дьиэҕэ истиэнэ тыаһы-­ууһу төһө киллэрэрин СӨ тутууга уонна дьиэни-уоту кэтээһиҥҥэ судаарыстыбаннай управлениета, «Роспотребнадзор» хайалара даҕаны бэрэбиэркэлээбэттэр эбит.

Оттон ыаллар көһөн киирэн баран, истиэнэ нөҥүө сатаан утуппатахтарына, «102»-гэ эрийэн, дьуһуурунай полицияны ыҥыраллар. Кинилэр кэлэн боротокуол толорон баран аныгыс сырыыга диэри баран хаалаллар. Сорох аадырыстарга ыйга хаста да ыҥырар үҥсээччилэр бааллар. Сайабылыанньаларын ис хоһооно биир: истиэнэ нөҥүө тыас-уус, айдаан мэһэйдиир.

Роспотребнадзорга үҥсүҥ

Татьяна Антипкина, 203 микро-­оройуоҥҥа дьиэ тутааччы хампаанньалартан биирдэстэрэ, «РДР Групп» дириэктэрэ:

— Өскөтүн саҥа дьиэҕэ көһөн киирбит ыаллар тастан киирэр улахан тыаска-­ууска мэһэйдэтэр, ыаллара хас кэпсэтэллэрин, ытырдалларын барытын истэр түгэннэригэр, «Роспотребнадзор» аатыгар сайабылыанньа суруйан, идэлээх дьону ыҥыран, тыаһы мээрэйдэтиэхтэрин сөп. Анал приборунан хас децибел тыас киирэрин кээмэйдээн, акт толорон, дьиэҕитин туппут тэрилтэ баар итэҕэһи көннөрөрүн туһугар сайабылыанньа суруйуохтааххыт. Оччотугар дьиэлээхтэр киирбиттэрэ 5 сыл иһигэр туох баар итэҕэһи-быһаҕаһы тутааччылар көннөрүөхтээхтэр. Холобур, атыыласпыт дьиэҕитигэр аһаҕас хайаҕас, бүөлэммэтэх дьөлөҕөс, курдары көстөр көҥдөй розетка баар түгэнигэр, туппут тэрилтэҕэ тута биллэриэххэ наада.

Биһиги туппут монолитно-каркаснай уонна 112 сериялаах дьиэлэрбит олохтоохторуттан биир да үҥсүү киирбэтэҕэ. Истиэнэ сөбүгэр халыҥ, сииктэрин эмиэ үчүгэйдик бүөлүүбүт, аныгы лифтэр тыастара кыра, муостаҕа тугу эмит түһэрдэх­тэринэ, аллараа ыалга иһиллибэтин туһугар тыаһы кыччатар матырыйаал туттабыт.

Түүн 45 децибелтэн улаатыа суохтаах

Евдокия Львова, «Роспотреб­надзор» управлениетын Саха сиринээҕи салаатын санитарнай хонтуруол, лицензия, регистрация оҥоруутун начаалынньыгын солбуйааччы: 

— Саҥа тутуллар дьиэлэри кэрийэ сылдьан, биһиги бэрэбиэркэлээбэппит, үксүн дьон үҥсүүтүнэн эрэ үлэлиибит. Ол курдук, РФ СанПиН ирдэбилин быһыытынан, дьон олорор элбэх кыбартыыралаах дьиэлэригэр тыас-уус күнүскү кэмҥэ муҥутаан 55 децибелтан, түүн 45 дБ тахсыа суохтаах.

Манна биири өйдүөххэ наада, уопсастыбаннай бэрээдэги кэһии таҕыстаҕына, ким эрэ улаханнык айдаардаҕына, дириэлинэн истиэнэни үүттээтэҕинэ, уулуссаҕа миитин ыыттахтарына, мечеккэ итэҕэл сиэрин-туомун толорууга, уопсайынан, дьон тыаһыыр-­ууһуур түгэнигэр приборунан чинчийии оҥорбоппут. Дьон бэрээдэгин полиция көрөр.

«Роспотребнадзор» ититэр ситим, бойлернай, лифт, элбэх кыбартыыралаах дьиэҕэ бастакы этээскэ баар бородуукта маҕаһыыннара, рестораннар, кафелар кондиционердара, холодильниктара дыыгынаан, мэһэйдиир түгэнигэр хас дБ тахсарын приборунан кэмниибит уонна акт оҥоробут. Итинник тыаска-ууска мэһэйдэтэн, 2017 сылга 58 сайабылыанньа киирбитэ. Ол түмүгүнэн, Бүөтүр Алексеев аатынан уулуссаҕа баар «Хрустик» кафе суут ыйааҕынан сабыллан, атын сиргэ көспүтэ.

Сокуон быһыытынан, саҥа дьиэ тутуллан, дьон киирбитин кэннэ биэс сыл мэктиэлэнэр болдьохтоох, ол кэм иһигэр туох эмит итэҕэс-быһаҕас көһүннэҕинэ, тутуу тэрилтэтэ ону көннөрүөхтээх. Бу тыас-уус өттүгэр эмиэ сыһыаннаах.

Түмүккэ

Маннык кыһалҕаҕа түбэспэт туһугар, саҥа дьиэ атыылаһыаххыт иннинэ, аттынааҕы, үөһээ-аллараа ыалларгытын кытта кэпсэтэн, сэниэлээх соҕустук муусуката холбооҥ уонна дьиэҕитигэр кэлэн төһө чугастык иһиллэрин кэтээн көрүҥ. Эбэтэр анараа бэйэҕит дьоҥҥутун ыытан, улаханнык кэпсэтэллэрин курдук көрдөһүҥ дьэ уонна иһиллээҥ!

Киһи дьиэни санаатаҕын аайы ас-таҥас курдук атыыласпат, онон дьиэҥ сыанатын, оройуонун, оптуобус тохтобула чугаһын-ырааҕын, инфраструктурата төһө сайдыбытын көрөрүҥ таһынан, истиэнэ тыаһы киллэрэрин-суоҕун, аттыгар хайдах ыал түбэһэрин эрдэттэн билэр ордук.

Тыаһы децибелынан тэҥнээн көрдөххө:

25-35 дБ — сибигинэйэн кэпсэтии, чаһы тыаһа;

45 дБ – көннөрү кэпсэтии;

55 дБ – чуолкайдык иһиллэр улахан саҥа, европейскай нуорманан офистарга тыас итинтэн улаатыа суохтаах;

75 дБ – киһи хаһыыта, күлсүү-салсыы;

80-90 дБ – пылесос тыаһа;

90 дБ — перфоратор тыаһа;

110 дБ — бөртөлүөт тыаһа.

Марианна Тыртыкова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0