“Бэчээт тиэргэнэ” быыстапка-дьаарбаҥка Саха сирэ Арассыыйаҕа холбоспута 385 сылыгар ананар. Ол чэрчитинэн, бу бэлиэ даатаҕа аналлаах кинигэлэр быыстапкаларын А.Пушкин аатынан Национальнай бибилэтиэкэ туруорда.
Атырдьах ыйын 25 күнүгэр өрөспүүбүлүкэтээҕи медиа-кииҥҥэ турбут быыстапкаҕа кыраайы үөрэтэр отдел элбэх научнай үлэлэри, ыйынньык литератураны, учебниктары, альбомнары, энциклопедиялары, историческай кинигэлэри аҕалан көрдөрдө.
Манна Василий Иванов “Вхождение Якутии в состав России”, “Россия-Якутия: сквозь призму истории” кинигэлэрэ, “Республика Саха: 2016 год”, 2 томнаах “Энциклопедия Якутии”, “Иллюстрированный атлас Якутии”, “Сокровище Якутии” альбомнар, “Летопись г. Якутска” о.д.а. альбомнар бааллар.
—Сэттэ стеллажка эрэ кинигэни аҕалаҕыт диэбиттэрин иһин, аҕыйаҕы аҕаллыбыт. Биһиги бибилэтиэкэбит 1,5 мөлүйүөн кинигэ пуондалаах. Быыстапкабыт Георгий Башарин “В составе свободной России” диэн кинигэтиттэн саҕалаан, историяны кэрэһилиир элбэх кинигэни көрдөрүүгэ туруорда, — диэн Национальнай бибилэтиэкэ иһинэн үлэлиир Хотугу норуоттар литератураларын киинин сүрүннүүр бибилэтиэкэрэ Галина Карадчина кэпсээтэ.
Ангелина ВАСИЛЬЕВА, «Cаха сирэ” хаһыат, edersaas.ru