close
Покровскайга «IT-хакатон» күрэхтэһии түмүктэннэ...
Кыһа - Олох-дьаһах

Покровскайга «IT-хакатон» күрэхтэһии түмүктэннэ

Алтынньы 5-7 күннэригэр Покровскайдааҕы 2-с №-дээх оскуола спортивнай саалатыгар IT-хакатон күрэхтэһии буолла. Бу сонун куонкурус тэрийээччилэринэн Покровскайдааҕы колледж уонна 2-с №-дээх оскуола, оттон координатордарынан СӨ Инновацияҕа, цифровой сайдыыга уонна инфокоммуникационнай технологияларга министиэристибэтэ, Үөрэх уонна наука министиэристибэтэ, өрөспүүбүлүкэтээҕи IT салаатын сайдыытын Ассоциацията буолаллар.

Куонкуруска 15 устудьуон уонна 19 үөрэнээччи (9-11 кылаастар) буолан, уопсайа 10 хамаанда кытынна. Хас биирдии хамаанда бэйэтэ менеджердээх, дизайнердаах уонна программистаах.

Хакатон үөрүүлээх арыллыытыгар СӨ Инновацияҕа, цифровой сайдыыга уонна инфокоммуникационнай технологияларга миниистир солбуйааччы Николай Гришаев, Хаҥалас улууһун баһылыгын солбуйааччы Федор Ноговицын, IT салаатын сайдыытын Ассоциациятын толорооччу дириэктэрэ Мичил Стручков, Профессиональнай үөрэхтээһин сайдыытын институтун дириэктэрин эбээһинэһин толорооччу Иннокентий Оконешников, СӨ Үөрэх министиэристибэтин уопсастыбаннай сэбиэтин бэрэссэдээтэлэ, WorldSkills Юниор координатора Михаил Черосов кытыннылар. Бу күн бэлиэ түгэнинэн улуус дьаһалтата уонна өрөспүүбүлүкэтээҕи IT салаатын сайдыытын Ассоциацията бииргэ үлэлэһэргэ сөбүлэһии түһэрсибиттэрэ буолла. Маны таһынан, Мичил Стручков куонкурус кыттыылаахтарыгар IT салаатыгар лекция аахта.

Үс күн устата эдэр программистар «Туризм Хангаласского улуса» уонна «Сервисы для развития Хангаласского улуса» диэн икки тиэмэнэн бырайыак оҥорууга үлэлээтилэр. Ону тэҥэ IT эйгэтигэр ситиһиилээхтик үлэлиир, биллэр-көстөр дьону кытта көрүстүлэр. Ол курдук, күрэхтэһии иккис күнүгэр «Синет» хампаанньалар бөлөхтөрүн разработчига Владислав Тетерин ыалдьыттаата. Кини өрөспүүбүлүкэҕэ IT эйгэтин сайдыытын туһунан, «Синет» үлэтин, сайт оҥоруу технологиятын билиһиннэрдэ. Оттон «Avatek» хампаанньа сүрүннүүр инженерэ Николай Нилов информацияны көмүскээһиҥҥэ техническэй ньымалар тустарынан лекция аахта.

Куонкурус бүтэһик күнүгэр кыттааччылар бэлэмнээбит бырайыактарын көмүскээтилэр. Ол курдук, «Сообщество творческих умов» диэн ааттаммыт Покровскайдааҕы колледж хамаандата туристарга анаммыт мобильнай сыһыарыы оҥорбуттарын билиһиннэрдэ. «SquBoys» Покровскайдааҕы 2-с №-дээх оскуола үөрэнээччилэрин хамаандата «URHome» бырайыагы, о.э. дьиэ-уот булунарга табыгастаах мобильнай сыһыарыыны көмүскээтэ.

«ИСиП-18» хамаанда (Покровскайдааҕы колледж) «GRIS Travel» бырайыага эмиэ туристарга аналлаах — бэлиэ күннэр, бырааһынньыктар сонуннарын туһунан дааннайдарга олоҕурар. «Quickmaths» (Покровскайдааҕы 2-с №-дээх оскуола үөрэнээччилэрэ) Покровскай куорат олохтоохторугар туһуламмыт Web-сайты билиһиннэрдэ. «IT-шники» (2-с №-дээх оскуола үөрэнээччилэрэ) «Покровскай инникитэ» диэн бырайыак оҥорбут. Бу эмиэ Покровскай олохтоохторуттан киирбит этиилэри, боппуруостары быһаарарга туһуламмыт сайт буолар. «Кубиль-виль» Покровскайдааҕы 3-с №-дээх оскуола үөрэнээччилэрин хамаандата Өлүөнэ Туруук хайаларыгар туристары ыҥырар сайт бырайыагын көмүскээтэ.
«Фемида» хамаанда (Покровскайдааҕы 2-с №-дээх оскуола үөрэнээччилэрэ) «Сайт Администрации г. Покровск» диэн куорат дьаһалтатын исписэлиистэригэр араас кыһалҕалаах боппуруоһу быһаартарарга анаммыт сайты билиһиннэрдэ.

«МТПГ» устудьуоннар хамаандалара «Путеводитель по Хангаласскому улусу» бырайыагы көмүскээтэ. Бу улуус бэлиэ сирдэрин каартата буолар.  «ПоКо» эмиэ устудьуоннар хамаандалара «Доставка еды в г. Покровск» диэн ас-үөл тиксэриинэн дьарыктанар Покровскай маҕаһыыннарын сайтын оҥорбут. «OurFuture» (Покровскайдааҕы 3-с №-дээх оскуола үөрэнээччилэрэ) «TourTap» сайты оҥорон көмүскээтэ.

Бу араас хайысхалаах, бэрт интэриэһинэй тутуллаах бырайыактары Михаил Черосов, Мичил Стручков, Илья Федоров (Информационнай технология уонна сибээс Департаменын салайааччытын солбуйааччы), Игорь Иванов – IT салаатыгар урбаанньыт уонна Татьяна Алексеева – «Росторг» IT- технологиялар сайдыыларыгар дириэктэрэ сыаналаатылар.

Түмүккэ устудьуоннар икки ардыларыгар IT-хакатон кыайыылааҕынан «ИСиП-18» хамаанда «GRIS Travel» бырайыага буолла. Иккис миэстэни «Сообщество творческих умов» ылла. Үһүс миэстэҕэ «ПоКо» хамаанда тигистэ. Оттон оскуола үөрэнээччилэригэр «OurFuture» хамаанда бастаата. Иккис миэстэҕэ «IT-шники», үһүс «Фемида»хамаандалар буоллулар. Маны таһынан, тэрийээччилэр номинацияларынан биирдиилээн кыайыылаахтары эмиэ быһаардылар. «Бастыҥ программист» — Александр Иппатьев, «Бастыҥ дизайнер» — Сахая Иванова, «Бастыҥ менеджер» — Ярослав Киреев буоллулар. Кыайыылаахтар дипломунан уонна туоһу суругунан, бириистэринэн наҕараадаланнылар.

Ольга Гермогенова, edersaas.ru сайтка анаан.

 

#бүгүн: 1
0
0

Сайт матырыйаалларын ааптар көҥүлэ суох ылар бобуллар.

Мин санаам:

четыре × два =