Иван Белолюбскай: “Көбүөр, помост аттыгар эһигинниин бииргэ буолуом”

Ааптар: 
Бөлөххө киир:

Ааспыт субуотаҕа, “Триумф” Спорт киинигэр ыытыллыбыт “Чөмпүйүөн Кубога” турнир кэмигэр “Дыгын оонньууларын” сэттэ төгүллээх кыайыылааҕын, национальнай көрүҥнэргэ спорт бочуоттаах маастарын, өрөспүүбүлүкэ физическэй култуураҕа, спорка үтүөлээх үлэһитин, Уус Алдан улууһун бочуоттаах олохтооҕун Иван Белолюбскайы улахан спортан үөрүүлээхтик атаарыы буолла.

Ил Дархан, бырабыыталыстыба дьаһалтатын салайааччы Федор Борисов үөрүүлээх тэрээһини аһарыгар Иван Белолюбскайы “саха номоххо киирбит боотура” диэн туран, өрөспүүбүлүкэ “Гражданскай килбиэн” бэлиэтин туттарда.

Иван Прокопьевичка бэйэлэрин эҕэрдэ, махтал тылларын Ил Түмэн бэрэссэдээтэлэ Александр Жирков, Конституционнай Суут бэрэссэдээтэлэ, “Сахааада-спорт” бэрисидьиэнэ Александр Ким-Кимэн, сэттэ улуус баһылыктара, ол иһигэр төрөөбүт дойдутун — Уус Алданын баһылыга Алексей Федотов, о.д.а. тиэртилэр. Кини уһун сыллаах сыралаах үлэтэ, сүүһүн көлөһүнүн тилэҕэр аҕаан ситиспит дьоһун кыайыылара “Саха Өрөспүүбүлүкэтин физическэй култууратын, спордун сайыннарыыга өҥөтүн иһин”, “СӨ үрдүк физкультурнай үөрэхтээһинигэр үтүөлэрин иһин” түөскэ кэтиллэр бэлиэлэринэн, РФ ИДьМ үбүлүөйдээх бэлиэтинэн, Ил Түмэн Бочуоттаах Грамотатынан, кыһыл көмүс чаһытынан сыаналанна. Иван Белолюбскай аата “Сахаада-спорт” ассоциация Бочуотун кинигэтигэр киллэрилиннэ.

Харда тылыгар Иван Белолюбскай “Хайа баҕарар спортсмен иитээччилээх, такайааччылаах буоллаҕына ситиһиилээх, инникилээх буолар диэн санаалаахпын”, — диэн туран, олоххо суолун булунарыгар көмө-тирэх буолбут, кыайыыттан кыайыыга сирдээбит тириэньэрдэрин Григорий Дьячковскайы, Лазарь Яковлевы, Дмитрий Платоновы, Александр Слепцову, Петр Дегтяреву, Андрей Аксеновы махтал истиҥ тылларынан аҕынна. Спорт эйгэтигэр сиэтэн киллэрбит бастакы тириэньэрин, аҕыс уонус хаарын санныгар уулларбыт Григорий Константиновиһы сыанаҕа ыҥыран таһааран бэйэтин бэлэҕин –соҕуруу эмтэнэн, сынньанан кэлэргэ путевканы — туттарда.

Иван Белолюбскай, «Дыгын оонньууларын» сэттэ төгүллээх кыайыылааҕа:

—Спорт эйгэтиттэн мин букатыннаахтык барбаппын. Онуоха бу бүгүн эһиги иннигитигэр турар «Боотур» кулуубум кыракый, эдэр иитиллээччилэрэ туоһу буолаллар. Кинилэр инникитин бэйэлэрин кыайыыларынан, ситиһиилэринэн дьоннурун-сэргэлэрин, тириэньэрдэрин үөрдэ сылдьыахтара дии саныыбын. Онон мин көбүөр, помост аттыгар эһигинниин бииргэ буолуом.

Роман Попов, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0