Саха сиригэр 1993 сылтан алтынньы үһүс баскыһыанньатыгар Ийэ күнүн бэлиэтииллэр. Быйыл бу күн алтынньы 15 күнүгэр түбэһэр. Бүгүҥҥүттэн Ийэ күнүгэр анаммыт тэрээһиннэр саҕаланнылар. Былаан быһыытынан, сэтинньи 28 күнүгэр диэри салҕанан барыахтара.
Бүгүн Ийэ пааматынньыгар сибэккилэри уурдулар, үөрүүлээх миитин ыытылынна. Музыка уонна фольклор мусуойугар норуодунай бэйиэт Леонид Поповка анаммыт «Илиибэр эн илииҥ баар курдук» быыстапка арылынна. Тапталы туойбут бэйиэт элбэх ырыа буолбут хоһооннооҕо биллэр.
Алтынньы 19 күнүгэр Ярославскай аатынан мусуойга Мария, Сэмэн Руфовтарга анаммыт «Муза и поэт» быыстапка аһыллыаҕа. Осипов галереятыгар алтынньыга-сэтинньигэ «Северная мадонна» быыстапка үлэлиэҕэ.
ЗАГС управлениетыгар сэтинньи 26 күнүгэр өр кэмҥэ бииргэ олорбут, үбүлүөйдээх дьоһун пааралары чиэстиэхтэрэ.
Ийэ күнүгэр анаммыт үөрүүлээх тэрээһин алтынньы 19 күнүгэр ыытыллыа, манна элбэх оҕолоох, дьоһун үлэһит ийэлэри чиэстиэхтэрэ, судаарыстыбаннай наҕараадалары туттарыахтара. Өрөспүүбүлүкэ салалтата дьахтар хамсааһынын актыбыыскаларын кытта көрсүөҕэ.
Министиэристибэлэр, тэрилтэлэр туспа бырагырааманан тэрээһиннэри ыытыахтара, элбэх оҕолоох ийэлэри чиэстиэхтэрэ. Холобур, тыа хаһаайыстыбатын министиэристибэтэ тыа сирин үлэһит дьахталларыгар көлүөнэлэр көрсүһүүлэрин тэрийиэҕэ, бааһынай хаһаайыстыбалары салайар дьахталларга семинардары ыытыаҕа.
Доруобуйа харыстабылын министиэристибэтэ алтынньы 27 күнүгэр ийэ уонна оҕо доруобуйатыгар, ийэ үүтүнэн аһатыыга анаммыт тэрээһиннэри ыытыаҕа. Оҕо уонна дьахтар консультацияларыгар аһаҕас аан күннэрэ ыытыллыахтара.
Быйыл өрөспүүбүлүкэҕэ Дьоруой ийэ уонна “Ийэ Албан аата” бэлиэлэр олохтоммуттара. Алтынньы 24 күнүгэр Өксөкүлээх аатынан култуура киинигэр аан бастаан Дьоруой ийэлэргэ анал бэлиэлэри уонна биирдии мөлүйүөн солкуобайы туттарыахтара.
Ону тэҥэ ыйы быһа араас куонкурустар, көрсүһүүлэр, быыстапкалар, литературнай биэчэрдэр, уо.д.а. тиһигин быспакка ыытылла туруохтара.
Ангелина Васильева, “Саха сирэ” хаһыат, edersaas.ru