Дьокуускайга номоххо киирбит сыщик Виталий Измеров аатынан уулусса баар буолла
Биһиги сайтпыт иһитиннэрбитин курдук, от ыйын 10 күнүгэр Саха сиригэр ис дьыала уорганнара тэриллибиттэрэ 100 сыла бэлиэтэнэр уонна итинэн сибээстээн, кэккэ тэрээһиннэр ыытылыннылар.
Биир бэлиэ уонна дириҥ суолталаах тэрээһин саха милииссийэтэ тэриллибит күнүгэр — бэҕэһээ, от ыйын 10 күнүгэр — Дьокуускай куоракка буолла. Ол — Сайсары оройуонугар милииссийэ генерал-майора, уос номоҕо буолбут, аатырбыт сыщик Виталий Измеров аатынан уулуссаны арыйыы. Бу туһунан СӨ ИДьМ-тын пресс-сулууспата иһитиннэрдэ.
Виталий Константинович аатын үйэтитэр бу идиэйэ олоххо киириитигэр сүүрбүт-көппүт үтүөлээх дьонунан СӨ ИДьМ-тын Бэтэрээннэрин сэбиэтэ уонна биллэр суруналыыс Альбина Избекова буолаллар.
Ис дьыала миниистирэ, полиция генерал-майора Владимир Прокопенко эҕэрдэ тылыгар Виталий Измеров аатынан уулусса аһыллыыта бүтүн ис дьыала уорганнарыгар улахан чиэс буоларын бэлиэтээтэ.
Саҥа уулуссанан милииссийэ 70-80-с сыллардааҕы массыыналара ааспыттара бэрт сонуннук көһүннэ.
— Виталий Константинович рядовойтан саҕалаан, генерал-майорга тиийэ үүммүт, идэтин муҥутуур баһылаабыт, киһи быһыытынан үрдүк хаачыстыбалардаах киһи этэ. Самбоҕа спорт маастара, өрөспүүбүлүкэ үтүөлээх тренерэ, ССРС милииссийэтин үтүөлээх үлэһитэ. Кини аатын үйэтитэргэ этиибин Дьокуускай куорат Гордуумата өйөөбүтүгэр махтанабын. Бу боппуруос олоххо киириитэ уустуктук уонна өр соҕустук быһаарылынна эрээри, биһиги киин куораппытыгар Виталий Измеров аатынан уулусса баар буолбутугар олус диэн үөрэн турабыт.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.