Өймөкөөн «Хотугу принцессалара» дьүкээбил суһумунуу күлүмнээтилэр (ВИДЕО)
Тымныы полюһа Өймөкөөн улууһун Томтор нэһилиэгэр тыа сирин куустатын оҕо саадтарын иитиллээччилэрин «Принцесса Севера-2018» куонкуруһа буолан ааста.
edersaas.ru
Бу олус интэриэһинэй, төрөппүттэртэн бэрт үгүс сыраны эрэйэр тэрээһини Сордоҥноох олохтоохторо, биэс кыыс ийэтэ, элбэх оҕолоох иллээх дьиэ кэргэн иэримэ дьиэтин хаһаайката, «Кэнчээри» оҕо саадын иитээччитэ Мария Максимова уонна өр сыл култуураҕа ситиһиилээхтик үлэлээбит, киинэ бэтэрээнэ Екатерина Дягилева тэрийдилэр.
Сонун бырайыагы Екатерина Тимофеевна толкуйдаабытын иитээччи Мария Васильевна тута өйөөн, иккиэн улуустааҕы таһымнаах гына тэрийэн, үгүс дьону сөхтөрдүлэр. Онон Үтүө дьулуур уонна волонтер сылыгар сордоҥноохтор үгүс үтүө дьыалаларыгар кырачаан кыргыттар куонкурустара көмүс буукубунан суруллан, нэһилиэк историятыгар киирдэ.
Куонкуруска биэс сааһыттан үөһээ 4 уһуйаантан, холбоон 14 «принцесса» кытынна: Сордоҥноохтон – 4, Томтортон – 2, Өймөкөөнтөн – 6, Биэрэк Үрдүттэн – 2. Кырачаан кырасаабыссалар алта түһүмэххэ бэйэлэрин кыахтарын көрдөрдүлэр.
Ол курдук, дьүүллүүр сүбэ саха национальнай көстүүмүн, бэйэни билиһиннэрии, кыһыҥҥы сон муодатын, бэйэ талаанын көрдөрүүнү, авангарднай муоданы, аныгы хотугулуу таҥас муодатын сыаналаатылар.
Көрөөччүлэр уран тарбахтаах иистэнньэҥ ийэлэр бараммат фантазияларыттан сөхтүлэр.
Кырачааннар оруолларыгар киирэн, кылааннаах күндү түүлээх бары көрүҥүн, хотугулуу, эриэккэс муоданы көрдөрдүлэр.
Авангарднайга муодаҕа Өймөкөөннөөҕү уһуйаан иитиллээччитэ, Индигир Эбэҕэ анаан оҥоһуллубут көстүүмүн сиэҕэр, дьиҥнээх мууһунан оҥоһуллубут үс балыгы иилинэн, лыҥкынатан, көрөөччүлэри салыннарда. Оттон кумааҕы арааһынан (ас пакетыгар тиийэ!) оҥоһуллубут киһи үөйбэтэх, кэрэ көстүүлээх көстүүмнэри этэ да барбаккын.
Ити курдук, хас биирдиибит бэйэтин баҕа санаатынан, үбү-аһы көрдөөбөккө, кырачааннарга, биир дойдулаахтарыгар ханнык баҕарар тэрээһини тэрийиэн сөп холобурун Сордоҥноох нэһилиэгин дьахталлара Екатерина Дягилева уонна Мария Максимова көрдөрдүлэр. Үтүө дьыала уонна дьулуур өрүү батыһыннарыылаах буоллун!
Елена ПОТОЦКАЯ, «Саха сирэ» хаһыат, edersaas.ru