Бу күннэргэ Өймөкөөн улууһун Үчүгэй нэһилиэгин олохтоохторугар шефтээх тэрилтэлэрэ — «Хаҥалас» көмүс хостуур рудник суол оҥорорго туттуллар погрузчигы нэһилиэктэригэр аҕалан биэрдэ.
edersaas.ru
— 2016 сыллаахха «Көмүс хостооччулар — тыа сиригэр» бырайыакка олоҕуран, промышленнай тэрилтэлэри нэһилиэктэргэ сыһыаран, шефтэһии үлэтин саҕалаабыппыт. Ол курдук, “Западнай” артыал – Төрүт, “Хаҥалас” көмүс хотуур тэрилтэ – Үчүгэй, «ТЗРК» АУо – Томтор нэһилиэктэрин кытта шефтэһэллэр. Александр Карась салайар «Хаҥалас» көмүс хостуур тэрилтэ — улуус социальнай-экэнэмиичэскэй олоҕор араас өйөбүлү оҥорор биир тарбахха баттанар, киэн туттар тэрилтэбитинэн буолар, — диэн кэпсиир Өймөкөөн улууһун дьаһалтатын баһылыга Михаил Захаров.
— Погрузчик — тыа сиригэр олус наадалаах тиэхиньикэ. Быйыл биһиги 1,5 км усталаах муниципальнай суоллары өрөмүөннүөхтээхпит. Онон биһиги көрдөһүүбүтүн ылынан өрөмүөн ыытар саамай тоҕоостоох кэмҥэ Александр Карась салайар тэрилтэтэ олус наадалаах бэлэҕи оҥордо. Бу биир эрэ кэмнээх өйөбүл буолбатах. Соторутааҕыта ыстаадаҕа үлэлии кэлбит бэтэринээр устудьуон кыргыттар кэлэн иһэр тиэхиньикэлэрэ алдьанан хаалбытыгар көрдөспүппүтүгэр, бөртөлүөтүнэн тиийэн ылбыттара. Аны ыраах тыаҕа сүппүт дьону көрдүү сылдьан, төннөн иһэн Күбүмэ суола алдьанан, аара хаайтара сытар оскуола оҕолорун эмиэ бөртөлүөтүнэн Томторго илдьэн биэрбиттэрэ. Онон нэһилиэкпит социальнай-экэнэмиическэй сайдыытыгар эрэ буолбакка, ыксаллаах түгэннэрбитигэр тиийэ олус көмөлөөх промышленнай тэрилтэ биир сыл иһигэр дьоһуннаах өйөбүлү оҥордо.
Түгэнинэн туһанан, улууспут баһылыгар Михаил Захаровка көмүсчүттэри тыа сиригэр сыһыарар кэскиллээх бырайыагы олоххо киллэрэн, олус наадалаах үлэни ыытарыгар махталбытын тиэрдэбит, — диэн этэр «Үчүгэй нэһилтэгэ» МТ баһылыга Валентин Атласов.
«Хаҥалас» көмүс хостуур тэрилтэтин салайааччыта Александр Карась тыа сиригэр олус наадаалаах тиэхиньикэни үөрүүлээх быһыыга-майгыга туттара туран:
— Биһиги улууспут норуоттар доҕордоһууларынан аатырар. Тыйыс усулуобуйалаах хотугу сиргэ олорор дьон бэйэ-бэйэбитин өйөһө олоруохпутун наада, — диэн тоһоҕолоон бэлиэтээтэ.
Погрузчик Өймөкөөн куустатын дьонун үгүстүк абырыырыгар саарбахтаабаккын. Сайын-күһүн аайы Күбүмэ-Үчүгэй-Томтор икки ардынан алдьанар суолларга хаайтарбыт дьон-сэргэ чугастыы өрүү үчүгэйдэри көмөҕө ыҥыраллар. Ыксаабыт дьоҥҥо Үчүгэй нэһилиэгин олохтоохторо көмөлөспүт түгэннэрэ үгүс.
Оттон Өймөкөөн улууһа, кырдьык, элбэх омук түөлбэлээн олорор сиринэн биллэр. Манна 60-ча араас омук бэрэстэбиитэллэрэ биир эйэлээх дьиэ кэргэн курдук олороллор. Онон промышленниктар тыа сирин олохтоохторун өйүүллэрэ — норуоттар доҕордоһууларын биир чаҕылхай холобура.
Елена ПОТОЦКАЯ, «Саха сирэ» хаһыат, edersaas.ru