Бэҕэһээ, олунньу 9 күнүгэр, Ньурба улууһугар ситэриилээх былаас отчуота саҕаланна. Манна бырабыыталыстыба бэрэссэдээтэлин солбуйааччы Михаил Гуляев салалтатынан 30-ча киһилээх улахан бөлөх кэлэн үлэлии сылдьар.
edersaas.ru
Ситэриилээх былаас бэрэстэбиитэллэрэ үс аҥыы хайдыһан, нэһилиэктэри үс күн барыларын хабыахтара.
Маҥнайгы күн М.Д.Гуляев баһылыктаах бөлөх улуус уһук нэһилиэктэрин Мэҥэдьэк (Хатыы) уонна Бордоҥ (Маалыкай) олохтоохторун кытта көрүстэ. Бөлөҕү Ньурба улууһун баһылыга Алексей Иннокентьев, улуус мунньаҕын бэрэссэдээтэлэ Сергей Евсеев арыаллаатылар. Кытыы сир кыһалҕата, үгэс курдук, элбэх буолар. Олортон боччумнаахтарын эрэ эттэххэ, айан суолун тутууну, электричество уотун күүһүрдүүнү, сибээс аныгы ситимин тупсарыыны туруорустулар.
Итини сэргэ 2 тыһ. тахса киһи олорор Маалыкайыгар үйэ аҥаарын анараа өттүгэр тутуллубут Култуура дьиэтэ үйэтин моҥообутун үрдүк сололоох ыалдьыттар бэйэлэрин эттэринэн-хааннарынан биллилэр. Баараҕай мас тутуу ол курдук анныттан сытыйан, хамнаан, тымныыта сүрдээх. «Аҕаларбыт, эһэлэрбит өссө чиҥник, бөҕө-таҕа гына тутаннар, тулуктаһан турар», — дииллэр кулууп үлэһиттэрэ.
Михаил Гуляев биригээдэтэ бүгүн Маар, Дьаархан, Чаппанда олохтоохторун кытта көрсүһүө. Сарсын Күндээдэҕэ отчуоттаан баран, киэһэ Ньурба куоракка түмүк мунньахха кыттыыны ылыа.
Кылгастык бэлиэтээтэххэ, ханна даҕаны көрсүһүү көхтөөхтүк, кэпсэтии сэргэхтик бара турар. Суолталаах, сиэрдээх туруорсуулар боротокуолга киллэриллиэхтэрэ. Былырыыҥҥы отчуот түмүгүнэн 27 боппуруос толорууга ылыллыбытыттан 22 боппуруос быһаарыллыбыт, 2 үлэҕэ сылдьар, 3 олоххо кыайан киирбэтэх.
Василий Никифоров,edersaas.ru