Арассыыйа күнүгэр (РЕПОРТАЖ)

Ааптар: 
Бөлөххө киир:

Арассыыйа күнүнэн киин куорат Ленин болуоссатыгар тэриллибит үөрүүлээх миитиҥҥэ Ил Дархан эбээһинэһин быстах кэмҥэ толорооччу Айсен Николаев, сүрүн федеральнай иниспиэктэр Виктор Хохрин, Конституционнай суут бэрэссэдээтэлэ Александр Ким-Кимэн, Хоккайдо вице-губернатора Цудзи Ясухиро (Япония), өрөспүүбүлүкэ Судаарыстыбаннай сүбэһитэ Андрей Борисов, Федерация Сэбиэтин чилиэнэ Александр Акимов, Ил Түмэн бэрэссэдээтэлин бастакы солбуйааччы Анатолий Добрянцев, «Дьокуускай куорат» куораттааҕы уокурук баһылыгын э.т. Петр Ефремов уо.д.а. кыттыыны ыллылар.

Ил Дархан э.б.к.т. Айсен Николаев бэйэтин эҕэрдэтигэр, киһиэхэ төрөөбүт дойдутун, дьиэ кэргэнин, аймах-билэ дьонун олохторо-дьаһахтара туруктаах буолалларын туһугар олорортон, үлэлииртэн, айартан-тутартан ордук сибэтиэй дьыала суоҕун бэлиэтээтэ:

Биһиги дойдубут, Улуу Арассыыйа, тыһыынчанан сыл устата сүүһүнэн араас омуктары биир дьиэ кэргэҥҥэ түмэн, инники сайдыыга киэҥник хардыылыыр. Тастан ханнык даҕаны мэһэйдэр, санкциялар дойду сайдарын атахтыыр кыахтара суох. Саха сирин хас биирдии олохтооҕо Саха Өрөспүүбүлүкэтэ Арассыыйа быстыспат сорҕото буолбутун, буола да туруоҕун үчүгэйдик билэр, өйдүүр. Биһиги дойдубут илгэ-эйэҕэ, доҕордоһууга аһаҕас. Аны икки хонугунан Москваҕа, Лужникига футболга аан дойду чөмпүйэнээтэ саҕаланыаҕа, аан дойду дьонун болҕомтото онно тардыллыаҕа. Онуоха матчтар тэриллэр куораттарыгар эрэ буолбакка, дойду бүттүүнэ норуоттар икки ардыларыгар доҕордоһуу уонна үрдүк култуура холобурун көрдөрүөхтэрэ. Күндү доҕоттор, биир дойдулаахтарым, барыгытын Арассыыйа күнүнэн эҕэрдэлиибин, дьолу-соргуну, ситиһиилээх үлэни-хамнаһы баҕарабын! Туругурдун Саха сирэ, туругурдун Улуу Арассыыйа!

Үрдүкү судаарыстыбаннай наҕараадалар

Айсен Сергеевич салгыы үрдүкү судаарыстыбаннай наҕараадалары туттартаата. Арассыыйа Бэрэсидьиэнин быыбарын тэрээһинигэр көхтөөхтүк кыттыбыт «Лена» киинэ тыйаатырын дириэктэрэ Алексей Егоров, Норуот фронун эрэгийиэннээҕи ситэриилээх кэмитиэтин бэрэссэдээтэлэ Валерий Лютый, «Анаабыр алмаастара» ААУо генеральнай дириэктэрэ Павел Маринычев, ХИФУ ректорын э.т. Евгений Михайлова, агротехнологическай үөрэхтээһин, экология уонна туризм научнай-үөрэтэр киинин дириэктэрэ Гаврил Семенов Арассыыйа Бэрэсидьиэнэ Владимир Путин Махтал суругун туттулар. Монополиялары утары федеральнай управление Саха сиринээҕи салаатын салайааччы Юрий Игнатьев «Саха Өрөспүүбүлүкэтин норуотун хаһаайыстыбатын үтүөлээх үлэһитэ», ХИФУ профессора, историк учуонай Анатолий Алексеев, ХИФУ кафедратын сэбиэдиссэйэ Алина Находкина «Саха Өрөспүүбүлүкэтин үөрэҕириитин үтүөлээх үлэһитэ» аатынан уо.д.а. бэлиэтэннилэр.

«Мин – Арассыыйа гражданинабын!»

Бүгүн Арассыыйа гражданиннара буолбуттарын туоһулуур пааспары ылбыт оҕолорго  икки хос үөрүү тосхойдо. Орто оскуолалар бастыҥ үөрэнээччилэригэр, өрөспүүбүлүкэтээҕи олимпиадалар, научнай-практическай кэмпириэнсийэлэр кыайыылаахтарыгар Надежда Алексееваҕа, Диана Дмитриеваҕа, Алина Ивановаҕа, Александр Малюсаҕа, Ксения Новиковаҕа, Диана Романоваҕа, Айдар Тагировка, Оскар Яковлевка Ил Дархан э.т. Айсен Николаев Арассыыйа Федерациятын гражданинын пааспардарын туттарда!

Устудьуоннар тутар этэрээттэригэр – старт

Арассыыйа күнүттэн устудьуоннар тутар этэрээттэрин үлэтэ саҕаланара үтүө үгэскэ кубулуйда. Болуоссаты кыйа стройдаан турар биир пуорма таҥастаах эдэр ыччаттар кэккэлэриттэн Арассыыйа устудьуоннарын тутар этэрээттэрин Саха сиринээҕи салаатын хамандыыра Айсен Соловьев чиҥник үктээн тахсан, Ил Дархан эбээһинэһин быстах кэмҥэ толорооччуга араапар биэрдэ. Үрдүк уонна орто үөрэх кыһаларын устудьуоннарын тутар этэрээттэрин 500 байыаһа сайыҥҥы уһун өрөбүл кэмигэр норуот хаһаайыстыбатыгар үлэлииргэ бэлэмнэрин иһитиннэрдэ.

Тутар этэрээттэргэ кыттыыны ылыы эһиэхэ, туох да үлэттэн толлон турбат, эппиэтинэстэн куттаммат эдэр дьоҥҥо, бу – бэйэҕитин көрдөрөр, салайар-тэрийэр дьоҕургутун арыйар кыаххыт буолар,диэтэ Айсен Николаев устудьуоннарга туһаайан. – Быйыл сааскы халаан уута улахан хоромньуну оҥорон ааспытынан, эһиги иннигитигэр судургута суох сорук турар. Халаантан эмсэҕэлээбит улуустар, нэһилиэктэр олохтоохторо эһигини эрэнэ кэтэһэллэр. Эһигини чөлүгэр түһэрэр үлэҕэ үтүө суобастаахтык үлэлиэхтэрэ, эһиги көмөҕүтүгэр тирэҕирэн айгыраабыт хаһаайыстыбалар олохторун-дьаһахтарын сөргүтүөхтэрэ, кыстыгы бэлэмнээх көрсүөхтэрэ диэн биһиги эрэнэбит. Устудьуоннар тутар этэрээттэрин үлэтэ саҕаламмытынан ааҕабыт.

Көхтөөх айхаллыыр хаһыыга, дохсун ытыс тыаһыгар доҕуһуоллатан, үп-экономика кэллиэһигэр үөрэнэр Тускулаана Тутукарова, ХИФУ устудьуона Василий Григорьев уонна СГТХА устудьуона Владимир Мигалкин Арассыыйа устудьуоннарын тутар этэрээттэрин Саха сиринээҕи салаатын знамятын күөрэччи көтөхтүлэр. Бу знамя манна сайыҥҥы симиэстир бүтүөр диэри туруоҕа.

 Хантараах түһэрсэн аармыйаҕа сулууспалыы барыахтарын баҕарар ыччаттарга аахсыйа тэрийбит, сэрии сэбин дьоҕус быыстапкатын, полевой куукунаны аҕалбыт. Улаатан эрэ обургу уолаттар «Калашников» аптамааты ыһары-хомуйары ордук сөбүлээтилэр.  

Раиса СИБИРЯКОВА, «Саха сирэ» хаһыат, edersaas.ru

Хаартыскаҕа Андрей Сорокин (СИА) уонна ааптар түһэриилэрэ.

+1
0
+1
0
+1
0
+1
0
+1
0
+1
0
+1
0