Таатта улууһугар “Бастакы бөдөҥ көҕөн” диэн ааттаах сонун күрэх ыытыллан, бастакы куһу Вячеслав Васильев бултаата.
Анивера АКИМОВА, «Саха сирэ» хаһыат, edersaas.ru
Ыам ыйын 11 күнүттэн Алдан, Амма, Ленскэй, Мэҥэ Хаҥалас, Нам, Нерюнгри, Өлүөхүмэ, Таатта, Томпо, Уус Алдан, Уус Маайа, Хаҥалас, Чурапчы, Дьокуускай куорат уокуругар куска, хааска, куоҕаска, туотаайыга бултааһын кэмэ саҕаламмыта.
Таатта дьаһалтатын исписэлииһэ Анна Яковлева «Эдэр саас» сайтка иһитиннэрбитинэн,
улуустааҕы күрэхтэһии кыайыылааҕынан оройуоннааҕы киин балыыһа бырааһа Вячеслав Васильев буолбут.
— Мойуона кэтэҕэр ыам ыйын 11 күнүгэр 24 ч. 45 мүнүүтэҕэ бастакы атыыр көҕөнүн бултаабыт. Көҕөн 1 киилэ 390 грамм ыйааһыннаах. Кыттааччылар бары булчукка ирдэнэр докумуоннарын тэрийэр хамыыһыйаҕа көрдөрдүлэр. Бултарын хаартыска уонна видео матырыйаалларынан бигэргэттилэр, — диэн эбэн эттэ.
Кыайыылаах эрэһиинэ тыынан уонна блок ботуруонунан наҕараадаланыаҕа.
Анивера АКИМОВА, «Саха сирэ» хаһыат, edersaas.ru