Уус Алдаҥҥа Курбуһах нэһилиэгэр “Күн бытархайа” ыччат улуустааҕы спартакиадата дуорааннаахтык буолан ааста. Быйылгы тэрээһин саха норуота киэн туттар, сүгүрүйэр бэйиэтэ Г.Г.Вешников-Баал Хабырыыс төрөөбүтэ 100 сылынан, ытык киһи төрөөбүт-үөскээбит сиригэр-уотугар ыытылынна.
—Быйылгы тэрээһини улуустааҕы ыччат отдела уонна Курбуһах нэһилиэгин дьаһалтата иилээн-саҕалаан, тэрийэн үрдүк таһымнаахтык ыыттылар. Манна аҕыс нэһилиэктэн 100-тэн тахса ыччат кытынна. Кинилэр волейболлаатылар, теннистээтилэр, сыал ыттылар, канат тардыстылар, хабылыктаатылар, хаамыскалаатылар. Ол кэнниттэн, Баал Хабырыыс хоһооннорун аахтылар, ырыа буолбут хоһооннорун толорон иһитиннэрдилэр, биирдии патриотическай ньүөмэри көрдөрдүлэр, — диэн кэпсиир нэһилиэк бибилэтиэкэрэ Марфа Пестрякова.
Маны сэргэ, Курбуһах бибилэтиэкэтин тэрийиитинэн билиини-көрүүнү тургутар өркөн өй оонньуутугар үстүү киһилээх сэттэ хамаанда күрэстэспит. Төрөөбүт тыл, сурук-бичик күнүнэн сурукка-бичиккэ, литератураҕа уонна Баал Хабырыыс олоҕор, айар үлэтигэр сыһыаннаах ыйытыыларга хоруйдаабыттар. Эрбии тииһин курдук эгил-тэгил эриһии түмүгэр Татьяна Васильева (Чараҥ) элбэх очукуоланан, “Өркөн өй” анал ааты ылбыт. Онтон бэстибээл уопсай түмүгүнэн Чэриктэй ыччатын хамаандата бастаабыт, иккиһи — курбуһахтар, үсүһү — өнөрдөр ылбыттар.
Уус Алдан улууһун историятын мусуойа — үлэ араас хайысхатыгар эдэр саастарыгар ситиһиилээх ыччаттарын, Курбуһах нэһилиэгин бибилэтиэкэтэ — Баал Хабырыыс олоҕун, айар үлэтин туһунан кэпсиир быыстапкалара болҕомтону тардыбыттар.
Ыччаттар тэрээһинтэн улаханнык сэргэхсийэн, дуоһуйа сынньанан тарҕаспыттар.
Сардаана БАСНАЕВА, “Саха сирэ” хаһыат, edersaas.ru