Сайын саҥа саҕаланна эрээри, «Якутскэнерго» ПАУо салаалара номнуо кэлэр кыстыкка бэлэмнэнэн эрэллэр.
Энергетиктэр уопсайа 26,03 МВА кыамталаах 75 трансформаторы, 10,7 МВт кыамталаах 7 дизель-генераторы, оттон «Сахаэнерго» тэрилтэ үлэһиттэрэ 41 МВт кыамталаах 112 дизель-генераторы өрөмүөннүөхтэрэ.
Билигин сорох нэһилиэктэргэ үлэ күөстүү оргуйан, Бэрдьигэстээх – Аһыма, Бэрдьигэстээх – Орто Сурт, Амма – Сулҕаччы, Сунтаар – Бордоҥ, Оҥхой – Үөһээ Бүлүү хайысхаларынан уот ситимин тирэхтэрин (опора) уларыта уонна бөҕөргөтө сылдьаллар. Ыам ыйыгар энергетиктэр 13 трансформаторы чөлүгэр түһэрдилэр. Дьокуускайдааҕы ГРЭС-кэ ГТЭ-45-3 гаас турбинатын өрөмүөннээтилэр. Бүлүүтээҕи ГЭС 5-с №-дээх агрегатын саҥардан оҥоро сылдьаллар. Дьокуускайдааҕы ТЭЦ-кэ ититии ситимин, тымныы уонна итии уу кэлэр турбаларын бэрэбиэркэлиэхтэрэ.
«Сахаэнерго» үлэһиттэрэ 86,8 км усталаах ситими өрөмүөннээн, нэһилиэктэргэ аныгы технологиянан оҥоһуллубут анал бүрүөһүннээх ситимҥэ (СИП) көһөрүүгэ бары күүстэрин уураллар. Депутатскайдааҕы ТЭЦ-кэ паар турбинатын, ууну ититэр хочуоллары, ититии ситимнэрин бэлэмнии сылдьаллар. Быйыл Өймөкөөн улууһун Орто Балаҕан, Эдьигээн улууһун Кыстатыам, Кэбээйи улууһун Сэбээн Күөл нэһилиэктэригэр күн күүһүнэн үлэлиир саҥа электростанциялар үлэҕэ киллэриллиэхтээхтэр. Сэттэ хотугу улууска уопсайа 7,31 МВт кыамталаах автоматизированнай дизельнай электростанциялар тутуллаллара былааннанар.
Оттон «Теплоэнергосервис» Алданнааҕы салаатыгар КВТС-20 диэн үс котлоагрегаты, Охотскайга – КВМ-3,5, Уус Маайаҕа – КВМ-2,5 агрегаттары өрөмүөннээтилэр. Маны таһынан, энергетиктар өссө 14 хочуол агрегатын бэлэмниэхтэрэ. Алдан улууһун Чагда уонна Кутана нэһилиэктэригэр баар электростанцияларга үс саҥа хочуолу туруоруохтара.
Киин уонна Арҕааҥҥы электрическэй ситимнэр биригээдэлэрэ быйыл 253,73 км уот ситимин өрөмүөннээтилэр. Былаан быһыытынан 617,6 км оҥоһуллуохтаах.
Бу киэҥ далааһыннаах үлэ барыта дьон-сэргэ сылаас дьиэҕэ үөрэ-көтө кыстыырын туһугар оҥоһуллар.
Саргылаана Федорова, «Якутскэнерго» пресс-сулууспата. «Эдэр саас» сайтка анаан.