Бырабыыталыстыба бэрэссэдээтэлин солбуйааччы Михаил Гуляев салайааччылаах бөлөх бүгүн Күндээдэ олохтоохторугар отчуоттаата. Бу былаас бэрэстэбиитэллэрэ тыа сирин дьонун кытта көрсүһүүлэриттэн биир бүтэһиктэрэ.
edersaas.ru
Санатан эттэххэ, былырыын күндээдэлэр былаас үлэтин биһирээбэттэрин биллэрбиттэрэ. Ол төрүөтүнэн сэбиэскэй былаас эстиэҕиттэн биир даҕаны социальнай эбийиэк тутулла илигэ этэ. Бу даҕаны сырыыга тутуулары күүскэ туруорустулар. Ол курдук, оскуола, оҕо саадын дьиэлэрэ уонна спорт саалата сыл аайы кураанах эрэннэриигэ хаалалларыттан хомойоллорун итийэн-кутуйан туран этиннилэр.
Ити эрээри, бөлөх иһигэр баар тустаах биэдэмэстибэлэр салайааччылара уонна Ньурба улууһун баһылыга Алексей Иннокентьев боппуруоһу чуолкайдык быһаарбыттарын түмүгэр уоскуйдулар.
Дьиҥэр, өрөспүүбүлүкэ бүддьүөтүттэн оскуола тутуутун саҕалыырга 96 мөл. солк. суумалаах үп бэриллэн баран, урукку салалта сыыһа дьаһайан, тутуу технологията кэһиллэн, улуустан тутан ылбыттар. «Сыыһабытын билинэн, тутууну алмаас дивидениттэн үп кырыйан, саҕалыахпыт», — диэн баһылык эрэннэрдэ. Бырайыага бүппүт. Ити гынан, биир тэлгэһэҕэ туралларынан, маҥнай оҕо саадын тутуу саҕаланара ордук диэн түмүккэ кэллилэр. Ол бүтэригэр оскуола тутуутугар турунуохтара. Оттон спорт саалатыгар нэһилиэк дьаһалтата улуустуун үлэлэһэн олоххо киллэриэх буолла.
Күндээдэ — улууска электроэнергияҕа толору холбонон олорор соҕотох нэһилиэк. Ыаллар онон оттук маска ороскуотурбакка абыраммыттар. Манна күүстээх подстанция туруоруллубута. Аны эргэ ситимнэри уларытыы быһаарылыннаҕына, күндээдэлэр күннэрэ өссө үөһэ күөрэйиэҕэ. Бу сырыыга тыл эппит дьон Михаил Дмитриевич отчуоту лоп-бааччы туруорбутун уонна бары ыйытыыларыгар чуолкай хоруйдары ылбыттарыттан астыналларын биллэрдилэр. Инньэ гынан, былаас үлэтин сүүс бырыһыан биһирээтилэр.
Салгыы Ньурба куоракка «Кыталык» Култуура дьиэтигэр көрсүһүү буола турар. Саала толору дьон. Онон тыл этиэн баҕалаах элбэх.
Василий Никифоров, edersaas.ru