close
Көрү көҕүрэтиэххэ, ыһыаҕы аҕыйатыахха
Биэтэс Билээхэп - Олох-дьаһах

Көрү көҕүрэтиэххэ, ыһыаҕы аҕыйатыахха

Сааспыт эрдэлээбит курдук буолбута эрээри, халлааммыт бэрт уһуннук хатаан, аҕыйах хонуктааҕыга диэри тымныы тыалынан силбиэтэнэ турбута. Ол бэйэтэ аны куйааран, сөрүүҥҥэ үөрэммит дьону буһартаан сиэри гынна. Айылҕа диэн күүс­тээх: кэлэн иһэр өттө кыайан, аҕыйах күн иһигэр биирдэ өрө анньан кэбистэ. Сир-дойду мутукчанан-сэбирдэҕинэн симэнэн, икки атахтааҕы күөх дуолга, көй салгыҥҥа угуйар-ыҥырар.

Быйылгы ыһыахтар, бэлиэр, саҕаланнылар. Кылааһынан-оскуоланан, нэһилиэгинэн-­улууһунан, уруунан-аймаҕынан дии-дии куоратынан-тыанан куомуннаһа-куодарыһа сахсаҥнаһыы, быыстала суох барыы-кэлии бөҕө буолан эрэллэр. Туох да диэбит иһин, сахалар көрү-нары сөбүлүүр  барахсаттарбыт. “Кыһыны быһа дьиэҕэ хаайтаран олорбут дьон тыыннарын таһааралларын бөөхүллэ-түөһээҥки оҕонньор тоҕо сүөргүлээтиҥ, бо­­бустуҥ. Ыһыах диэн өбүгэ саҕаттан үгэспит буоллаҕа”, — диэххит эрээри, былыргы туруорбах балаҕан саҕанааҕы олоҕу былыт саппыта быданнаатаҕа. Аныгы дьону дьиэҕэ хаайбаккын: суох да буоллаҕына, аҕыс араас албаһынан сылы эргиччи дьэ булан көрүлүүллэр, кыһын Кипргэ, Таилаҥҥа тиийэн сөтүөлээн кэлэллэр.

Быйылгы курдук улахан хоромньулаах, алдьатыылаах, сүүһүнэн ыал олоҕун-дьаһаҕын аймаабыт саас кэнниттэн көрү-нары көҕүрэтиэҕиҥ, ыһыаҕы-ырыаны аҕыйатыаҕыҥ. Айылҕаҕа тахсан айаарар-айдаарар аньыыта бэрт буолуо. Ол оннугар кылгас сайыммытын үлүмнэһэн, чөлүгэр түһэриигэ, кыстыкка бэлэмнэниигэ күргүөмүнэн саба түһүөххэ. Аммалар Саха сирин норуоттарын оонньуутун тэрээһинигэр бытаараннар, от ыйын саҥатыгар ыытыллыахтаах күрэхтэһиини атырдьах ыйыгар көһөртөрбүттэрин истэммин, от-мас үлэтин үгэнигэр тыа дьонун көрүнэн-оонньуунан аралдьытан, сүөһү аһылыгын бэлэмнээһин хампаанньатын тоҕор буоллулар диэн, испэр ытырыктата сылдьыбытым. Ону баара, айылҕабыт бэйэтэ сааһылаата бадахтаах. Ил Дархаммыт туох баар күүһү халаан содулун туоратыыга уурар туһуттан Оонньуулары эһиилгигэ көһөрөргө дьаһайбытын биир бэйэм сүүс бырыһыан биһирээтим.

Ааранан, хата, хаҥаластары хайгыы санаатым. “Орто дойду” комплекска буолуохтаах Ыччат ыһыаҕын, Өктөм нэһилиэгэ халааҥҥа барбытынан,  кэлэр сылга көһөртөрдүлэр. Сөп ээ. Дойду хааһынатыттан содулу оһорунууга харчы бэриһиннэрэн баран, күрэхтэһэн өрө көтө дуу, ыһыахтаан ыһыллаҥнаһа дуу сырыттахпытына – ким даҕаны өйдүө суоҕа. Эмсэҕэлээбит дьон сиэринэн сэмэйдик быһыыланыаҕыҥ. Мин этэрбин, сатаатар, халааҥҥа хаптарбыт улуустар, нэһилиэктэр дьаһалталара өйүөхтэрэ дии саныыбын. Маҥнай олоҕу-дьаһаҕы оннун булларыаҕыҥ. Кыһалҕаны кыайа-хото быһаардахха, бырааһынньык даҕаны ханна барыай —  баар буолуо.

Хаартыска: интэриниэттэн

 

#бүгүн: 1
8
0

Сайт матырыйаалларын ааптар көҥүлэ суох ылар бобуллар.

Мин санаам:

семнадцать − 6 =