Бүтүн Арассыыйатааҕы табаһыттар IV сийиэстэрин чэрчитинэн ыытыллыбыт “Көс ыал” күрэскэ 11 ыал кытынна.
Ангелина ВАСИЛЬЕВА, “Саха сирэ” хаһыат, edersaas.ru
Муоматтан, Өлөөнтөн, Аллара Халыматтан, Томпоттон, Анаабыртан, Өлүөхүмэттэн, Нерюнгриттэн, Кэбээйиттэн, Булуҥтан, Алдантан удьуор табаһыттар дьиэ кэргэттэрэ ох курдук оҥостон, бэлэмнэнэн кэлбиттэр. Кинилэр өбүгэлэриттэн кэлбит үгэстэри, олохторун укулаатын илдьэ сылдьар дьон.
Аҕыйах ахсааннаах хотугу норуоттар таба иитэр, табаны батыһан көһө сылдьар эрэ буоллахтарына, норуоттарын духуобунай, култуурунай баайдарын илдьэ хаалар кыахтаахтар. Оттон үгэстэр дьиэ кэргэҥҥэ бэриллэллэр. Онон маннык куонкурустар, бастатан туран, омук быһыытынан чөл хааларга көмөлөһөр оруоллаахтар, сайыннарар сыаллаахтар.
Көс ыаллар бары да элбэх оҕолоохтор. Бастакы миэстэни ылан, кыайыы өрөгөйүн билбит Голиковтар (Томпо) тоҕус оҕолоохтор (сорохторун иитэ ылбыттар). Громовтар (Муома) үс кэрэчээн кыыс оҕолоохтор. Замятиннар (Томпо) түөрт, Поповтар (Булуҥ), Алексеевтар (Өлөөн) үстүү оҕолоохтор.
Кыайбыт Дмитрий Гаврильевич уонна Антонина Николаевна Голиковтар Ыччат, дьиэ кэргэн министиэристибэтэ туруорбут “снегоход” бирииһинэн наҕараадаланнылар. Голиковтар салгыы өрөспүүбүлүкэтээҕи “Сыл бастыҥ дьиэ кэргэнэ” куонкуруска кыттарга ыҥырылыннылар.
Иккис миэстэни Анаабыртан Роман Дмитриевич уонна Екатерина Евдокимовна Туприннар (Анаабыр) ыллылар. Үһүс миэстэҕэ Семен Семенович, Милена Михайловна Алексеевтар тахсан, эрэһиинэ тыынан наҕараадаланнылар.
Ол да буоллар, манна кыайтарбыт диэн суох буолла. Барыларыгар “Спортивнай дьиэ кэргэн”, “Айар куттаах ыал”, “Удьуор утум” о.д.а. анал ааттары иҥэрдилэр. Ыаллар бары дьэрэкээн национальнай таҥастаахтар. Дьоҕурдарын, талааннарын арыйан, дьиэ кэргэн сыаннастарын, норуоттарын үгэстэрин көрдөрөн, сааскы салгыҥҥа дуоһуйа сынньанан, ураты бырааһынньыгы бэлэхтээтилэр.
Ангелина ВАСИЛЬЕВА, “Саха сирэ” хаһыат, edersaas.ru