Күүстээхтэр тэҥҥэ араарыллыбыттар (сэрэбиэйи ырытыы)

Ааптар: 
Бөлөххө киир:

Бүгүн, тохсунньу 27 күнүгэр Красноярскай куоракка Иван Ярыгин аатынан норуоттар икки ардыларынааҕы Гран-при турнир эр дьоҥҥо 57 уонна 74 кг ыйааһыннарынан саҕаланар. Бэҕэһээ киэһэ ити ыйааһыннарга кыттар бөҕөстөр сэрэбиэйдэрэ ыытылынна. Эһиги болҕомтоҕутугар сэрэбиэйи ырытыы.

Петр ПАВЛОВ, “Саха сирэ”, https://edersaas.ru

57 киилэҕэ барыта 28 бөҕөс кыттар. Ол иһигэр сүүрбэтэ – россияннар. Оттон омуктартан үс дьоппуон, иккилии казах уонна монгол, биир иранец бааллар. Россияттан кыттааччылары ырыттахха, дагестанецтар – ахсыалар (Ильясов, Исрапилов, Идрисов, Угуев, Бадрутдинов, Гебеков, Абакаров, Магомедов). Оттон биһиги – биэс кыттааччылаахпыт: Окороков, Александров, Тютрин, Флегонтов, Григорьев. Бурятиялар соҕотох киһилээхтэр, оҕолорго олимпийскай чөмпүйүөн Алдар Балжинимаев.

Күүстээхтэртэн кимнээх баалларый диэтэххэ, иранец Реза Атри, Рустам Ампар, дьоппуон Юки Такахаси, Артем Гебеков, Хуреш Дондук Оол, Сюрюн Омак бары үөһэ бөлөххө киирбиттэр. Оттон аллараа бөлөхтөн Заур Угуевы, Азамат Тускаевы, Нариман Исрапиловы чорботуохха сөп. Манна биллэн турар, бэйэбит уолаттарбытын ахсаантан бырахпаппыт.

Уопсайа үөһээ бөлөххө – 12, аллараа – 16 кыттааччы баар. Үөһээ бөлөххө сахалартан уолаттарга Европа чөмпүйүөнэ Георгий Окороков соҕотоҕун баар, уоннааҕылар бары аллараа бөлөххө түбэспиттэр.
Окороков бастакы эргииргэ уопуттаах бөҕөс, Россия чөмпүйэнээтин призера, кабардинец Расул Машезовы кытта тустуоҕа. Сүүрбэ саастаах Амма ыччата маннык улахан таһымнаах күрэхтэһиигэ бастакы холонуута. Биллэрин курдук, маннык быраабы кини былырыын уолаттарга Европа күрэхтэһиитигэр 50 киилэҕэ бастакы миэстэҕэ тахсан ылбыта. Онон бу күрэхтэһии киниэхэ уопут ылыы быһыытынан сыаналанар.

Аллараа бөлөххө Ньургун Александров дьоппуон Гаку Аказавалыын киирсиэҕэ. Аказава Япония чөмпүйэнээтин призера буола сылдьыбыта уонна Кызыл куоракка “Азия киинэ” турнирга миэстэлэспитэ. Бу хапсыһыыга биһиги Ньургуҥҥа улаханнык эрэнэбит.
Арыйаан Тютрин эмиэ бастакы эргииргэ дьоппуон Тошихиро Хасегавалыын тустар буолбут. Бу бөҕөс соторутааҕыта Япония императорын кубогар Юки Такахаси кэнниттэн иккис миэстэни ылбыта. Тютрины кэнники күрэхтэһиигэ көрдөххө, үчүгэй таһымҥа киирбит. Онон кыайыа дии саныыбын. Өскөтүн, мин билгэлиирим курдук, Александровтаах Тютрин дьоппуоннары кыайдахтарына, салгыы эргииргэ бэйэ-бэйэлэрин утары тахсаллар.
Бу ыйааһыҥҥа биир сэргэх тустуулаах уолбут Владимир Флегонтов уопуттаах Нариман Исрапиловы кытта бастакы эргииргэ көрсөр буолбут. Дагестанец билигин туох-ханнык таһымҥа сылдьара биллибэт. Онон бу тустууга хайалара кыайарын сабаҕалыыр уустук. Ол да буоллар, биһиги Флегонтовы кимтэн даҕаны толлубат, хайаан да тустан баран тэйэр бөҕөс быһыытынан сыаналыыбыт.
Оттон кэнники кэмҥэ тахсыылаах тустууну көрдөрөр Эдуард Григорьев эмиэ дагестанец Ибрагим Ильясовтыын тустуоҕа уонна кыайарыгар бүк эрэнэбин. Оо, уолаттарбыт утарсааччыларын хотон, салгыы эргииргэ бэйэ-бэйэлэрин кытта тусталлара буоллар.
Салгыы эргиирдэр хайдах буолуохтарын, ким кими кытта көрсүөн сөбүн киһи улаханнык эппэт, быһа саҥаран кэбиһиэн баҕарбат. Көбүөр көрдөрөн иһиэ.

Дьэ, сэрэбиэйи көрөн баран, бэйэбит уолаттарбыт киирсиилэригэр мин санаам итинник. Ханныгын да иһин, сэрэбиэй куһаҕана суох. Күүстээхтэр тэҥҥэ араарыллыбыттар. Маннык балаһыанньаҕа уолаттарбыт хайдах баҕарар тустар кыахтаахтар. Эрдэттэн сабаҕалаабыппыт быһыытынан, бу ыйааһыҥҥа киһи ойуччу тутар киһитэ суох, бары тэҥ сыһа таһымнаах тустууктар. Дьэ онон, күн кимиэхэ тыгар, кыайыыны тосхойор? Оттон биһиги бэйэбит уолаттарбытыгар ыалдьабыт уонна ситиһиини эрэ баҕарабыт.

Петр ПАВЛОВ, “Саха сирэ”, https://edersaas.ru

+1
0
+1
0
+1
0
+1
0
+1
0
+1
0
+1
0