Тырааныспар хайа да көрүҥэр уопсастыбаннай бэрээдэги, сокуону тутуһуу ирдэнэрин киһи барыта бэркэ диэн билэр. Ол эрээри, ону кэһээччилэр син биир бааллар бөҕө буоллаҕа.
Вера МАКАРОВА, «Саха сирэ» хаһыат, edersaas.ru
Ааспыт ыйга биһиги сайтпытыгар «Александр Горбунов: “Ааспыт сылга ыар буруйу оҥоруу тахсыбата” диэн мин РФ ИДьМ-тын Уһук Илиҥҥи транспорка линейнэй управлениетын начальнига, полиция полковнига Александр Горбуновтуун кэпсэтиибит бэчээттэммитэ. Онно киниттэн атын регионнарга курдук, биһиэхэ ааспыт сылга айан кэмигэр итирэн баран айдаарар-содуомнуур дьон баарын-суоҕун ыйыппытым.
Онуоха начаалынньык: «Оннук чахчы суоҕа эрээри, арыгы иһэн кэлбит киһи улахан айдааны таһаарбакка эрэ, көннөрү үөхсүүтэ, ыыс-бурут тыллары туттуута сыл аайы 4-5 чахчы баар буолааччы. Оннук түбэлтэҕэ экипаж биһиги дьуһуурунай чааспытыгар эрийэн биллэрэр, оччоҕо бу киһини тиийбит сиригэр полиция үлэһиттэрэ көрсөллөр. Маныаха бэлиэтээн эттэххэ, арыгы иһэн кэлбит киһини регистрацияттан устуу биитэр бу киһини эбийиэккэ киллэрбэт буолууну авиакомпаниялар эбэтэр аэропорт салалтата быһаараллар, биһиги оннук боломуочуйабыт суох. Биһиги киһи уопсастыбаннай сиргэ арыгы испит туруктаах сылдьарын иһин административнай эппиэккэ тардыахпытын сөп«, — диэн хоруйдаабыта.
РФ ИДьМ-тын Уһук Илиҥҥи транспорка линейнэй управлениетын пресс-сулууспата иһитиннэрбитинэн, бу кулун тутар ый саҥатыгар номнуо икки киһи административнай сокуону кэһэн, эппиэккэ тардыллыбыт.
Бастакы түбэлтэҕэ, Черскэй бөһүөлэгэр көппүт сөмөлүөккэ итирик туруктаах 68 саастаах дьахтар экипаһы уонна айаннаан иһэр дьону кытта бурайсан, айдааны тардыбыт.
Оттон иккис быһылаан Иркутскай куораттан Ленскэйгэ көтөн испит АН-24 сөмөлүөккэ тахсыбыт. Ол туһунан бу көтөр аал хамандыырыттан иһитиннэрии киирбит. Бурятия 47 саастаах олохтооҕор, сөмөлүөт аэропорка кэлэн түһээтин, РФ Административнай кодексатын 20.21-с ыстатыйатынан («Уопсастыбаннай миэстэҕэ итирик сылдьыы») дьыала тэриллибит.
Бу ыстатыйанан накаастабыл миэрэ быһыытынан, 500 солк. — 1000 солк. суумалаах ыстараап биитэр 15 сууккаҕа диэри хаайыы көрүллэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.