Биир үтүө күн Дьокуускайга Поярков уулуссатын 21/1 нүөмэрдээх дьиэтин аттыгар турар киоск оннугар дьоҕус маҕаһыын эмискэ баар буолан хаалбытын көрбүт дьон соһуйдулар. Бу – Дьокуускайдааҕы көтөр иитэр фабрика павильона.
Инньэ гынан, фабрика Дьокуускай куоратынан, Нам сэлиэнньэтинэн уонна Мохсоҕоллоох бөһүөлэгинэн барыта 22 фирменнэй маҕаһыыннаммыт. Аны сотору Курнатовскай уулуссата саҕаланар сиригэр эмиэ маннык павильону арыйарга былаанныыллар эбит. Кыһыҥҥы тымныыга таһырдьа туран, түннүгүнэн атыылаһар курдук буолуо дуо. Сылааһа, сырдыга! Кэҥээннэр, сымыыт 8 көрүҥүн кытта көтөр этиттэн бородууксуйа эгэлгэтин, полуфабрикаттары, оннооҕор Дьокуускайдааҕы килиэп кэмбинээтин кондитерскай оҥоһуктарын атыылыыр буолбуттар.
Бу түөлбэҕэ эргиччи тоҕустуу этээстээх дьиэлэр кэчигирэһэн тураллар. Онон элбэх киһи сылдьан атыылаһарыгар табыгастаах усулуобуйа олохтоммут. Кинилэри аны атыылааччы Светлана Березовская тымныы түннүк нөҥүө буолбакка, сылаас дьиэҕэ-уокка күн аайы үөрэ-көтө көрсүөҕэ.
Василий НИКИФОРОВ, «Саха сирэ» хаһыат, edersaas.ru
Анна СЕРГУЧЕВА (ТХМ пресс-сулууспата) хаартыскаҕа түһэриитэ.