close
podpiska

Каришка: «Мин хоту дойду оҕотобун» (БЛОГ)
Блогер колонката

Каришка: «Мин хоту дойду оҕотобун» (БЛОГ)

Бу суругунан «Эдэр сааска» Карина Колесова — Каришка блогун саҕалыыбыт. Блогу Карина ийэтэ Натальялыын суруйар. 


Мин Орто Халыма куоратыгар төроөөбүтүм, куоратым быйыл 375 сааһын туолбута. Кини кырдьаҕас да буоллар, үүнэ-сайда турар. Атырдьах ыйыгар Орто Халымаҕа элбэх ыалдьыт кэлэн улахан үбүлүөй буолан ааспыта. Мин онно сылдьыахпын олус баҕарбытым, ийэбин кытта былааннаммытым да, сатаан барбатахпыт, балыыһаҕа эмтэнэ киирэн.

Мин Халыма өрүс биэрэгэр күүлэйдиирбин, бэлисипиэтинэн биэрэк устун хатааһылыырбын олус сөбүлүүбүн. Дьиэм түннүгүнэн көстө сытар өрүспүт. Өрүспүт биһигини сыалаах, амтаннаах балыгынан күндүлүүр, саас, сайын, күһүн аайы дьоммун кытта Халыма Эбэбитин алаадьынан, үрүҥ аһынан күндүлүүбүт.

Халымам айылҕата эмиэ наһаа кыраһыабай, отоннуу, тэллэйдии сылдьааччыбыт. Саамай амтаннаах отоннор биһиэхэ үүнэллэр – морошка, киис тиҥилэҕэ, охта. Оттон тэллэйтэн үксүн маслята эрэ үүнэр. Күһүн өрүскэ лодка бөҕөтө кэлэр – барар отонньуттары, балыксыттары кытта. Мин убайым Паша аҕатын мотор тыаһынан билэр уонна биэрэккэ көрсө киирэр.

Мин ордук билигин дьиэбин, оскуолабын ахтабын, бииргэ үөрэнэр доҕотторбун, учууталларбын, аймахтарбын, маама үлэлиир сирин. Үөрэнэн бүтэн баран доҕотторбун кытта аргыстаһан дьиэлиибит, аара суолга хаарга оонньуубут, сыыртан сырылыыбыт, маҕаһыыннарга киирэн иттэбит, уонна барыта уу-хаар буолан төннөөччүбүт дьиэбитигэр. Ону мин наһаа ахтабын. Кыһыны сөбүлүүрүм ол биир биричиинэтэ.

Орто Халымам дьоно саамай үтүө санаалаах, боростуой майгылаах, куруук көмөҕө кэлэр дьон диэммин, ыалдьан баран биллим. Аан бастаан балыыһаҕа киирбит күннэрбитигэр маамабар суруйан, өйөбүл видео устан ыытан күүс-көмө буолбуттара, билигин даҕаны наар сибээскэ баарбыт биир дойдулаахтарбытын кытта. Кинилэргэ биһиги улаханнык махтанабыт!

Үтүөрэн баран мин ыам ыйыгар выпускной баалбар тиийэр баҕа санаалаахпын уонна улахан эрэллээхпин. Эһигини, подписчиктарбын, ааҕааччыларбын эмиэ ыҥырабын, Орто Халымаҕа баран кэлэр түгэн баар буоллаҕына, мүччү тутумаҥ!

Бу күннэргэ Дьокуускайга Орто Халыма күннэрэ буола тураллар, Инстаграм, батсаап нөҥүө кыратык ону-маны көрөбүт, үөрэбит. Биир дойдулаахтарбар улахан эҕэрдэ ыытабын! Ахтабын, таптыыбын Орто Халымабын! Мин хоту дойду оҕотобун диэммин киэн туттабын!

Каришка, edersaas.ru саайтка анаан. 

 

#бүгүн: 5
3
0

Сайт матырыйаалларын ааптар көҥүлэ суох ылар бобуллар.

Мин санаам:

16 − шесть =