Каспийскайга (Дагестан) ыытыллыбыт аан дойду биэс төгүллээх чөмпүйүөнэ Али Алиев кэриэһигэр көҥүл тустууга норуоттар икки ардыларынааҕы турнирга Саха сириттэн үс бөҕөс туһунна: Ньургун Александров, Дьулустаан Булатов уонна Герман Устинов.
Кинилэртэн Үөһээ Бүлүүттэн төрүттээх Ньургун Александров 61 киилэҕэ диэри ыйааһыҥҥа тахсыылаахтык тустан, боруонса мэтээл иһин кииристэ. Норуоттар икки ардыларынааҕы кылаастаах спорт маастара бастаан Ибрагим Ильясовы (Калининград), салгыы Мунх-Эрдэнэ Алтансувданы (Монголия) кыайталаан баран, финалга тахсар иһин хапсыһыыга Арассыыйа призеругар, Иван Ярыгин турнирын кыайыылааҕар Артем Гебековка хоттордо. Онтон үһүс миэстэ иһин киирсиигэ Арассыыйа призера Рустам Абдурашидовка 4:6 ахсаанынан баһыйтарда.
Дьулустаан Булатовпыт уонна Герман Устиновпыт 65 уонна 74 киилэҕэ диэри ыйааһыннарга барыллаан хапсыһыыларга хоттортоотулар.
Роман ПОПОВ, “Саха сирэ” хаһыат, edersaas.ru
+1
+1
+1
+1
+1
+1
+1