edersaas.ru сайтка оройуоннарга нэдиэлэ устата туох интэриэһинэй буолбутун таһаарабыт. Кэбээйиттэн маннык сонуннар киирдилэр.
“Эрэл” Култуура киинэ үчүгэйдик үлэлиир
Биһиги Арыктаах нэһилиэкпитигэр 2000 сыллаахха, оччотооҕу баһылыкпыт А.И.Татаринов саҥа кулуубу туттаран, үлэҕэ киллэрбитэ. Билигин бу “Эрэл” Култуура киинигэр дириэктэринэн Сардаана Татаринова, уус-уран өттүгэр методиһынан Надежда Иванова ситиһиилээхтик үлэлииллэр.
Саҥа үүммүт 2017 сылга, соторутааҕыта, Арыктаах “Эрэл” Култууратын киинигэр Дьокуускайтан СӨ үтүөлээх артыыһа, мелодист, ырыаһыт Степан Васильев айар бөлөҕүнээн кэлэн кэнсиэртээтэ. Онон, биир дойдулаахтарбын эстрада талааннаах ырыаһыттара Ника уонна Саха араадьыйатын “Үрдэл” музыкальнай биэриитин эрэдээктэрэ Иван Тарасов эгэлгэ кэрэ ырыаларынан күндүлээтилэр.
Оттон кулун тутар 4 күнүгэр “Эрэл” Култуура дьиэтигэр Арыктаах орто оскуолатын 50 сылын көрсө араас интэриэһинэй тэрээһиннэр, кэнсиэртэр буолаары тураллар.
“Ньидьили уолаттара” – норуодунайдар!
Чагда сэлиэнньэтин “Тускул” Култуура киинигэр “Ньидьили уолаттара” диэн ансаамбыл соторутааҕыта норуодунай ааты сүктэ. Салайааччылара – мелодист, СӨ култууратын туйгуна Иван Иванов.
Бу ансаамбылтан кынаттанан, Константин Эверстов, Майя Федорова, Владимир Маркинов, Виталий Эверстов улуус биллэр-көстөр ырыаһыттарынан буоллулар.
Нэһилиэк баһылыга Василий Павлов ансаамбылга тырааныспарынан куруутун көмөлөһөр эбит. Онон, ансаамбыл инники былаана үгүс.
Дархан бөлөҕө ыалдьыттаата
Соторутааҕыта Кэбээйи улууһун киинигэр Сангаарга уонна Кэбээйи нэһилиэгэр саха эстрадатын ырыаһыта Никита Баишев-Дархан айар бөлөҕө кэнсиэртээтэ. Дархан, Сайдыына уонна эстрада биир талааннаах артыыһа, фокусник Афанасий Говоров тыа сирин дьонун-сэргэтин бэркэ сэргэхситтилэр. Онон, бу айар үлэнэн умсугуйбут талааннаах дьоммутугар улахан махталбытын тиэрдэбит!
Ньидьилиттэн төрүттээх артыыстар
Кэбээйи улууһун Ньидьилититтэн төрүттээх эстрада артыыстара син элбээтилэр диэххэ сөп. Холобур, “Этигэн Хомус” биэс төгүллээх кыайыылааҕа, СӨ үтүөлээх артыыската Владлена Ноговицына-Сахаайа. Чагдаҕа улааппыт Климентий Федоров. Аан бастаан кини “Эрийэ-буруйа” диэн айар бөлөҕү тэрийбитэ, манна Сайыына, Бүөккэ Бөтүрүөп, Аскалон Павлов, Павел Семенов киирбиттэрэ, 1998 с. Кэбээйи улууһугар гастроллаабыттара. Клим Федоров 2000 с. иккис айар бөлөҕүн тэрийбитэ. Манна Антон Иванов, Василий Еремеев, Ангелина Файрушина, Гоша Васильев-Джида, Сахалина Ширяева, Сергей Сивцев киирбиттэрэ, биһиги улууспутугар гастроллаабыттара. Итиэннэ, эмиэ Чагдаттан төрүттээх айар куттаах дьонунан “Сахафильм” дириэктэрэ Дмитрий Шадрин уонна “ДетСАТ” бөлөх артыыһа Степан Порядин буолаллар.
Петр Ноговицын, Кэбээйи улууһа, Арыктаах.