Бу күннэргэ Дьокуускайга Кэбээйи улууһун күннэрэ буола тураллар. Ол чэрчитинэн, Кэбээйи улууһун баһылыга Игнатий Спиридонов салайааччылаах халыҥ дэлэгээссийэ СӨ үөрэҕин уонна наукатын миниистирин бастакы солбуйааччы Феодосия Габышеваны, министиэристибэ салааларын салайааччыларын кытта көрүстүлэр.
edersaas.ru
Биллэн турар, көрсүһүү тиэмэтэ – үөрэх боппуруоһа. Бастатан туран, федеральнай пилотнай бырайыак туһунан кэпсэттилэр. Ол курдук, улуус бырайыагы утарбатын биллэрэр, ол эрээри, оскуолалары кытта биир санааҕа кэлэн, үлэни уопсай сыаллаах ыытан, үчүгэй иитиилээх, киэҥ билиилээх үөрэнээччини иитэн таһаарыахтаапыт диэн баһылык санаатын эттэ. Моделы таларга муус устарга диэри өссө да бириэмэ баар диэн иһитиннэрдилэр. Маныаха Феодосия Габышева: “Улуус бэйэтэ талар моделын биһиги өйүүбүт. Дойду министиэристибэтэ быһаарыы ылынна даҕаны биллэриэхпит уонна үлэни ыыыппытынан барыахпыт”, — диэн эттэ.
Иккиһинэн, оскуола, уһуйаан тутууларын боппуруоһа. Ол курдук, Кальвица сэлиэнньэтигэр улуус бэйэтэ инвестордары булан оскуола-оҕо саадын сыбаайатын түһэртэрбит. Маныаха миниистири бастакы солбуйааччы, тутуу “бытыктаах”, ол эрээри, син биир иннибит диэки сыҕарыайыахтаахпыт диэн бэлиэтээтэ.
Сайылык сэлиэнньэтигэр былаанныыр 270 миэстэлээх оскуола туттаран, муусука оскуолатын, гимназия, эбии дьарык тэрилтэтин киллэрэр былааннаахтар эбит.
140 миэстэлээх оҕо саадын тутуута былааҥҥа баар эбит эрээри, тустаах бырайыак олоххо киирэригэр үп-харчы суоҕун иһитиннэрдилэр. Инвестордары көрдөөһүҥҥэ кэпсэтии ыытылларын эттилэр, ол эрээри эрэннэрбэтилэр.
Ону таһынан Чагдаҕа 80 миэстэлээх тутууну былааннылар эбит. “80 миэстэлээх биһиэхэ ханна даҕаны суох. Онон бэйэҕит көҕүлүөххүтүн сөп. Инвестиционнай бырагыраамаҕа бу бырайыак хабыллар кыаҕа суох”, — диэн быһаардылар. Итиэннэ “Үтүө дьыала” хамсааһын чэрчитинэн туруорсан көрүөххүтүн сөп диэн сүбэлээтилэр. Онон тутуу боппуруоһугар икки эбийиэк бырагыраамаҕа баарын, тутуллуохтарын иһитиннэрдилэр.
Үсүһүнэн, лааҕыр боппуруоһун тула кэпсэттилэр. “Лааҕыр боппуруоһунан муниципальнай тэриллии бэйэтэ дьарыктаныахтаах. Биһиэхэ лааҕыр тутуутугар, саҥалыы уларытан оҥорууга, хапытаалынай өрөмүөҥҥэ эҥин диэн анал бырагыраамаҕа үп-харчы суох. Онон улуус бэйэтэ үп-харчы көрөн быһаарыахтаах”, — диэн эттилэр министиэристибэ үлэһиттэрэ. Итиэннэ биэс сыл устата лааҕырдар базаларын бөҕөргөтүүгэ олохтоох министиэристибэттэн (ол иһигэр саҥалыы уларытан оҥорууга) анаан 2 мөл 365 тыһ. солк. барбытын иһитиннэрдилэр. Быйылгы сылга сайаапка киирбэтэҕин, онтон урукку сылларга бэриллибит сайаапканан испиһэккэ 2020 сылга туралларын, онон 900 тыһ. солк. тэрилинэн хааччыйыыга анаан көрүллүөҕүн иһитиннэрдилэр. Онтон Сэбээн Күөлгэ туруорсар лааҕыр боппуруоһунан үлэлэһиэхпит диэтилэр.
Людмила ПОПОВА, “Саха сирэ” хаһыат, edersaas.ru
Хаартыска: Виктор ЭВЕРСТОВ.