Кэбээйигэ түргэн тэтимнээх интэриниэт ситимин тардаллар

Бөлөххө киир:

СӨ Телебиидэньийэнэн уонна араадьыйанан биэриигэ техническэй киинэ «Кэбээйитээҕи экспресс» диэн ааттаах бырайыагы олоххо киллэрэргэ сыал-сорук оҥостон үлэлиир. Ол чэрчитинэн 700 км. уһуннаах волоконнай-оптическай сибээс ситимэ Дьокуускайтан Кэбээйи улууһугар тардыллан, олохтоохтору хаартыска, видео көрөргө харан хаалбат, түргэн интэриниэтинэн хааччыйыаҕа.  

edersaas.ru

СӨ сибээскэ уонна информационнай технологияҕа миниистир Александр Борисов этэринэн, бу бырайыак 14,5 тыһыынча нэһилиэнньэлээх Нам, Бүлүү уонна Кэбээйи улууһун олохтоохторун хабыаҕа. Аныгы сибээс ситимэ ыраах сытар уһук нэһилиэктэргэ тиийэн, тыа дьонун аан дойду ситимин кытта холбуоҕа.

Бырайыак маҥнайгы түһүмэҕэ 2018 сыл муус устар 9 күнүгэр саҕаланна. «Былырыын Кэбээйи улууһун Кальвица нэһилиэгэр 40 миэтэрэ үрдүктээх антенна тутан, Өлүөнэ эбэ нөҥүө Сангаарга радиорелейнай сибээс ситимин тардар кыахтанныбыт», — диэн үлэ хайдах баран иһэрин СӨ Телебиидэньийэнэн уонна араадьыйанан биэриигэ техническэй киин генеральнай дириэктэрин солбуйааччы Алексей Барашков билиһиннэрдэ.

Кини этэринэн, бу сыл төрдүс кыбаарталыгар 300 км. уһуннаах оптоволоконнай сибээс Дьокуускайтан Кальвица нэһилиэккэ тардыллан бүтүөҕэ. 10 Гбит/с кыамталаах түргэн интэриниэт Нам улууһун Өргөлөөх, Хоҥнор биэ нэһилиэктэригэр уонна Кэбээйигэ Сангаарга, Кальвицаҕа тиийиэҕэ.

Маны таһынан, быйыл Сангаарга нэһилиэнньэни уонна тэрилтэлэри интэриниэккэ холбуурга GPON оптическай ситим тутуллуоҕа. Суотабай сибээс оператордара оптоволоконнай сибээскэ көһөн, хаачыстыбалара өссө тупсуоҕа.

«Кэбээйитээҕи экспресс» бырайыак иккис түһүмэҕэ Кэбээйиттэн Бүлүү улууһун Кыһыл-Сыыр бөһүөлэгин диэки барыаҕа. Онон, арыйдахха көтөн иһэр түргэн интэриниэккэ холбонооччу тыа сиригэр элбээн иһиэҕэ. Сибээс аныгы ситимэ киирэн, үөрэх, доруобуйа харыстабыла, социальнай хааччыллыы уопсайынан, олох бары араҥата сэргэхсийэн, билиҥҥи олоҕу кытта тэҥҥэ хаамар кыахтаныа.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0