Гидрометеорологтар бэйэлэрэ даҕаны билинэллэринэн, халлаан хайдах-туох туруктаах буолуоҕун үс күн иһинэн чуолкайдык билгэлиэхтэрин сөп. Онтон ырааттаҕына, сабаҕалааһын эрэ буолар. Саха сиринээҕи гидрометсулууспа от ыйын хаалбыт уонча хонугар тугу сабаҕалыырый?
Халлааммыт от ыйын бастакы аҥаарыгар буһаран-уматан өлөртүү сыһан баран, бу нэдиэлэҕэ тыын ылларан, сөрүүдүйдэ. Күнү-дьылы кэтээччилэр “хотуттан тымныы салгын хамнаан, нуорматтан 4, сорох күн 6 кыраадыс сөрүүн буолуо” дииллэр. Түүнүн +6, +11, күнүһүн +18, +23 кыраадыс. Бүлүү сүнньүгэр — түүнүн +1, +6, сорох хотоол сиргэ 0 кыраадыска диэри намтыа (ол гынан баран, “хаһыҥ ханна даҕаны түһүө суоҕун” мэктиэлииллэр), күнүһүн +15, +20 кыраадыс.
Онон бу күннэргэ сүөһү аһылыгар саамай улахан былааннаах улуустарга сөҥүүтэ суох кураан, сөрүүн халлаан туран, тыа дьоно от үлэтигэр күүскэ түһүнэллэригэр табыгастаах буолла. Субуотаҕа быстахтык тэһитэ ардыан сөп. Манна сыһыаран эттэххэ, ааспыт ардах (от ыйын 16-17 күннэринээҕи) Хаҥалас, Уус Алдан, Чурапчы, Горнай улуустарыгар таппыт сиринэн балачча түспүт буоллаҕына, Намы, Мэҥэ Хаҥалаһы уонна Дьокуускайы “арыылаан ааста”. Нам улууһугар туорахтаах култуура 51-80 бырыһыана кураантан-куйаастан “умайбыта” билиннэ. Үүнээйи ситэригэр сөптөөх сиик аҕыйаҕа ити улууска уонна Хаҥалас илин эҥээригэр, Мэҥэ Хаҥаласка, Чурапчыга бэлиэтэнэр. Киин улуустары сэргэ Бүлүү, Үөһээ Бүлүү улуустарын кырдал-хордоҕой сирдэрэ кууран-хатан эрэллэрэ кураан дьыллар кимэллэрин чинчитэ буоллаҕа.
Кэлэр нэдиэлэттэн халлаан сайыҥҥылыы киэбин кэтэн, куйаарара күүтүллэр: түүнүн +8, +13, күнүһүн +21, +26 кыраадыс. Бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев от ыйын 19 күнүгэр оттооһун хаамыытыгар анаан ыыппыт видеоселекторынан мунньаҕар гидрометсулууспа бэрэстэбиитэлэ биирдиилээн улуустартан ыйытыыларга хоруйдаабытыттан сирдэттэххэ, атырдьах ыйа Өлүөхүмэҕэ сөҥүүлээх буолуо, Тааттаҕа ый бастакы аҥаарыгар тэһитэ ардыа. Атырдьах ыйынааҕы күн-дьыл туругун туһааннаах сулууспаттан ирдэһэн, кэлэр нэдиэлэҕэ хайаан даҕаны сиһилии билиһиннэриэхпит.
Василий НИКИФОРОВ, “Саха сирэ” хаһыат, edersaas.ru