Кэлэр үс сыллаах бүддьүөт туһунан сокуон барыла бастакы ааҕыыны ааста
“Саха өрөспүүбүлүкэтин 2018 уонна 2019-2020 сс. судаарыстыбаннай бүддьүөтүн” туһунан Саха Өрөспүүбүлүкэтин сокуонун барыла Ил Түмэҥҥэ бастакы ааҕыыны ааста.
Сүрүн дакылааты оҥорбут Үп миниистирэ Валерий Жондоров иһитиннэрэринэн, 2018 сылга өрөспүүбүлүкэ судаарыстыбаннай бүддьүөтүн дохуоттаах чааһа — 169 млрд. 773 мөл. солк., ороскуота – 171 млрд. 300 мөл. солк., дэпэсиитэ – 1 млрд. 527 мөл. солк. барылланар. Оттон 2019 уонна 2020 сс. бу көрдөрүү туһааннааҕынан маннык буолуохтаах: дохуот – 156 млрд. 637 мөл. солк. уонна 166 млрд. 680 мөл. солк., ороскуот – 158 млрд. 480 мөл. солк. уонна 168 млрд. 129 мөл. солк., дэпэсиит – 1 млрд. 843 мөл. солк. уонна 1 млрд. 449 мөл. солк. Онуоха доллар кууруһа барыллаан 2018 с. — 64,7 солк., 2019 – 66,9 солк., 2020 с. — 68 солк. быһыллыбыт.
Биллэрин курдук, дохуот сүрүннээн акцизтан, араас нолуоктартан-хомуурдартан киирэр үбүнэн итиэннэ субсидия, субвенция харчытынан таҥыллар. Ол курдук, тэрилтэлэр барыстарын нолуогуттан 2018 с. — 41 млрд. 394, 2019 с. — 40 млрд. 11 мөл., 2020 с. — 38 млрд. 194 мөл. солк. хомуллуохтаах. Барыс нолуогун 70 %-нын үс бөдөҥ хампаанньа (“АЛРОСА”, Сургутнефтегаз уонна Транснефтегаз) хааччыйаллар. Федерация бүддьүөтүттэн 2018 с. — 2 млрд. 827 мөл., 2019 с. — 1 млрд. 861 мөл., 2020 с. — 1 тыһ. 273 мөл. солк. субсидия, 2018 с. — 3 млрд. 162 мөл., 2019 с. – 3 млрд. 297 мөл., 2020 с. – 3 млрд. 336 мөл. солк. субвенция кэлэр, бүддьүөттэр икки ардыларынааҕы трансферга 2018 с. – 119 мөл., 2019 — 2020 сс. 124-түү мөл. солк. барылланар эбит. Бу курдук миниистир хас биирдии салаанан ырыта-ырыта, быһаарда. Дьокутааттар үгүс боппуруоһу биэрдилэр, кэккэ этиилэри киллэрэн тураннар, сокуон барылын бастакы ааҕыытын аһардылар.
Раиса СИБИРЯКОВА, “Саха сирэ” хаһыат, edersaas.ru