Араас таһымнаах, тиэмэлээх ыһыахтар буолуталаан аастылар. Олортон биир ураты ыһыаҕынан Дьокуускай куорат фитнес кииннэрин доҕордоһуу уонна сомоҕолоһуу ыһыаҕа буолла. Бу ыһыахха аан бастакытын кэрэ аҥардар икки ардыларыгар спортивнай күрэхтэһии ыытылынна. edersaas.ru
Ыһыах сүрүн тэрийээччитинэн спорт эйгэтигэр сыһыана суох, дьиэҕэ олорор кыргыттары дьарыктыыр фитнес-тренер Мария Тастыгина буолла:
— Мин бэйэм 110 киилэҕэ тиийэ уойбутум, ол кэнниттэн кроссфитынан дьарыктанан ырбытым. Билигин бэйэм тренербин, кыргыттары ыйааһын быраҕалларыгар дьарыктыыбын, ону таһынан, миэхэ дьарыктанар кыргыттарга умнуллубат түгэннэри бэлэхтии таарыйа, араас тэрээһиннэри ыытабын. Оннук биир тэрээһиним самаан сайыны көрсө Дьокуускайга баар фитнес кииннэр икки ардыларыгар күрэхтэһиини көҕүлээһин буолар. Барыта биэс хамаанда кытынна. Бастакы түһүмэх — бэйэни билиһиннэрии, иккис — ПП (сөптөөхтүк, доруобайдык аһааһын) бүлүүдэни астаан аҕалан билиһиннэрии уонна үһүс түһүмэх — биэс этаптаах спортивнай күрэх.
Кэрэ аҥардар күрэхтэһиилэрин салгыы видеоматериалга көрүҥ.
Анастасия АЛЕКСЕЕВА, «Саха сирэ» хаһыат, edersaas.ru