Кэрээннэриттэн тахсыбыт булчуттар

Бөлөххө киир:

Олунньу 8 күнүгэр Эдьигээннээҕи айылҕа харыстабылын иниспиэктэрэ Т.Т.Аполлонов  улуустааҕы  полиция үлэһиттэрин кытта   рейдэҕэ сылдьан,  Сэркии  үрэххэ браконьердар   38 кыыл табаны бултаабыт, сэймэктээбит сирдэрин булбуттара. Бу түбэ “Лииндэ”  ураты харыстанар сиргэ-уокка киирэр.  

edersaas.ru

Ол курдук, ааспыт ыйтан саҕалаан, түөрт киһи кыылы бултуурга туох даҕаны көҥүлэ суох эрээри, 38 кыыл табаны бултаабыттар. Өссө анаан-минээн тыстарын эрэ ылбыттар.   Табалары бултаабыт сирдэригэр,  аһаҕас халлаан анныгар хаалларбыттар. Бу маннык кэрээнэ суох быһыы оҥоһуллубутунан сибээстээн, Эдьигээннээҕи  полиция отделыгар холуобунай дьыала тэриллибит.

Аны туран, киһи кыһыйыах, бу түөрт киһини дьокутааттар көмүскэһэллэр эбит.

Оттон СӨ айылҕа харыстабылын миниистирэ Сахамин Афанасьев бу туһунан туох диирин билээри, сибээстэһэ сылдьыбыппытыгар:

— Ураты харыстанар сиргэ-уокка, резерваттарга бултааһын кытаанахтык бобуллар. Хомойуох иһин, сорох дьокутааттар ити дьону көмүскүүр санаалаахтар. Ол эбэтэр, хотугу аҕыйах ахсааннаах төрүт общиналар бултуохтарын сөп диэн куоһурданаллар. Маннык общиналар төттөрүтүн тулалыыр эйгэни, кыылы-сүөлү харыстыах тустаахтар, — диэтэ.

*    *     *

Дьэ кэрээннэриттэн тахсыбыт ньүдьү-балай санаалаах дьон!  Маанылаах кыыллары тыстарын эрэ тустарыттан бултууллара буолуо дуо?! Саатар, тыстарын эрэ ылбакка,  бултаабыт дьон быһыытынан киһилии  сыа-сым курдук астыа-үөллүө эбиттэр.

 Бэй. корр.,edersaas.ru

+1
0
+1
0
+1
0
+1
0
+1
0
+1
0
+1
0